Berria.info

Osteguna, 2014ko apirilak 24 - 10:44

2012-04-06

Literaldia jaialdia apirilaren 11tik maiatzaren 12ra egingo dute

Ekitaldi sorta zabal batekin, euskal literaturaren erakusleiho bilakatuko da berriro Bartzelona

Erredakzioa Donostia

Gaur egungo Euskal Herria literaturan lelopean, Literaldia jaialdiaren zortzigarren aldia egingo dute heldu den apirilaren 11 eta maiatzaren 12a bitartean, Bartzelonan. Antolatzaileek, hau da, Bartzelonako Euskal Etxeak, Bartzelonako Unibertsitateak (UB), Bartzelonako Unibertsitate Autonomoak (UAB) eta Hizkuntz Eskolak ekitaldi sorta zabala antolatu dute aurten ere, eta, hortaz, hiria euskal literaturaren erakusleiho bilakatuko da.

Liburu aurkezpenak, irakurle klubak, hitzaldiak, mahai inguruak, kontzertuak, kontakizun musikatuak, literatur ibilbideak, bertso afariak, erakusketak... Denetarik izango du aurtengoak ere. Antolatzaileek nabarmendu dute, gainera, ia ekintza gehienak doakoak direla. Programazioaren xedea da ahalik eta jende gehienarengana iristea. Horregatik, aurten teknologia berrien alde apustu egin dute, eta Twitter bidezko literatur lehiaketa antolatu. Jendea idazle sentitzeko plataforma moduan bururatu zaie ideia hori. Hartara, ipuin kolektibo bat, edo gehienez 140 karaktere izango dituen mikropuin bat idatzi ahal izango da. Datorren asteazkenean abiatuko da aurtengo aldia. Arantxa Urretabizkaiak Lehenago zen berandu (Alberdania, 1995) liburuarekin irakurle kluba egingo du.



© Berria.info - Euskal Editorea S.L.

Martin Ugalde Kultur Parkea, Andoain 20140 43.223785 -2.014929

Telefonoa: 943 304 030 / Faxa: 943 590 172

- www.berria.info

Lege Informazioa

MIDAS Kontseilua Bai Euskarari

Laguntzaileak:

Eusko Jaurlaritza

Gipuzkoako Foru Aldundia