Berria.info

Gizartearen presioak Gaztemaniak! egitarauaren desagertzea eragotzi ostean, Gipuzkoako Diputazioak kontzertuak antolatzeko bideratutako aurrekontuak zenbateko murrizketa izango zuen jakitea falta zen. Atzo argitu zuen zalantza: 90.000 euroko aurrekontua izango du -iaz baino %25 txikiagoa- eta diru horrekin hamahiru kontzertu antolatuko dituzte. Talde «minoritarioak, ausartak eta ezberdinak» ekartzeko ildoari eutsiko diote, eta emanaldi guztietan bertako talde batek joko du. Azken urteetan bezala, Donostia, Arrasate, Hondarribia, Oñati eta Zarauzko udalek kolaboratuko dute Diputazioarekin kontzertuen finantzaketan eta antolakuntzan.

«Okerrak zuzentzen dakienak asko daki» adierazi zuen Maite Etxaniz Gizarte Politikako diputatuak atzo. Aitortu zuen Gaztemaniak!-en alde sortutako mugimenduaren «indarrak» harridura eragin ziola, baina egitaraua «sustraituta» dagoela ikusteak pozten duela gaineratu zuen.

Ekaina bitartean zazpi kontzertu egingo dira, lehenengoa bihar bertan, Hondarribian, The Hidden Cameras taldearekin. Horrez gain, bi masterclass egingo dira. Horietako bat musika interpretatze eta konposatzeari buruzkoa izango da eta rock musikari eta ekoizle batek eskainiko du. Bestea, musika kritikari eta sare sozialetan aditu batek emango du.