Berria.info

«Espazio birtualetik harantzago doazen sareak sortu ditugu», diote Sareinak, feminismo literarioak blogeko kideek; «hainbat talde feministarekin harremanak egin, eta hezikidetzan lanean dabiltzan taldeekin elkarlanean urratsak egin ditugu». Euskal literatura «plazatik portura» eramateko asmoz sortu zuten Sareinak bloga duela hiru urte Iratxe Retolaza eta Josune Muñoz literatur kritikariek, Amaia Alvarez euskal filologoak eta Gema Lasarte kazetariak. «Badugu sarea, euskal literatura; badugu haria, literatur kritika; badugu jostorratza, teoria feminista, eta, jakina, badugu gogoa sarean sare aritzeko», zioen orduan kaleratu zuten manifestuaren pasarte batek. Euskarazko literaturan «zulo handiak» daudela ohartarazi zuten, baita zulo horietatik emakumeen liburuak amiltzen direla ere.

Sortzeko, hausnartzeko, kritika egiteko, transmititzeko eta irakasteko, nahiago dute portua plaza baino, «zabalagoa eta oraindik egituratzeko dagoen espazioa» dela uste baitute. Horrenbestez, Lekeitioko portuan, Bizkaian, elkartu ziren larunbat goiz batean Sareinak bloga aurkezteko. Ordudanik, hiru urte igaro dira, eta egindako lana aztertzeko, mahai-ingurua egingo dute gaur Gasteizen (70 tabernan, 19:00etan).

Euskararen unibertsoa, feminismoa eta literatura uztartu dituzte; hiru bide horien arteko bidegurutzean lan egin dute hiru urte hauetan, eta bidean «zenbait eztabaida zaharberritu» dituzte, baita «zenbait eztabaida berri zaharkiturik» daudela ohartarazi ere. Plazaren lau paretak eraisteko lan egin dute, emeki-emeki portua egituratu asmoz.

Blogean izandako eztabaidak jendearekin partekatu nahi dituzte orain, ikuspuntuak zabaldu, iritziak bildu eta kontrastatu, denen artean iruzkin aberasgarriagoa egite aldera. Sei hizlari izango dira horretarako: Gema Lasarte, Amaia Alvarez, Iratxe Retolaza, Josune Muñoz, Onintza Irureta eta Ainara Sarasketa. Blogaren sorreraz geroztik landuriko gaiak aurkeztuko dituzte, muturrera eramanez batzuetan, mahai-ingurura bildutakoak xaxatzeko eta parte-hartzea bultzatzeko asmoz. Izan ere, hori da sareginen helburuetako bat: euskarazko literatur feministaren sarea denen ekarpenez osatzea eta zabaltzea.

Bloga abiarazi zutenean edukiak sarriago berritzeko asmoa zuten, «erritmo handiko espazioa martxan jarri nahi genuen», adierazi dute. «Baina denborak aurrera egin ahala, konturatu ginen ezin geniola abiada horri eutsi». Lasaiago hartzea erabaki zuten, hortaz. «Alde horretatik, ez dugu mantendu hasieran aurreikusitako jarduna».

Aitzitik, bloga sareak sortzeko «erakusleiho baliagarria» bihurtu dela diote, baita «blogean argitaratzen ez diren hainbat eztabaida, elkarlan eta egitasmo aurrera eramateko» ere. Literaturazaleek eta feministek «elkarren berri izateko helburuari», halaber, ondo lotu zaiola uste dute. Esan dutenez, bide horretan urrats nabarmenak egin dituzte; «horren adibide dira Irakurle Taldea, Blogoneskak ataria, blogeko kideok elkarrekin argitaratutako hainbat testu, antolaturiko hainbat ikastaro eta etorkizuneko hainbat proiektu». Gizarte eredu jakin bati erantzuten dioten ikuspegietatik aldenduta lanean segitzeko konpromisoa berretsi dute, aurrerantzean sarea sendotzeko eta ekimenak aurrera ateratzeko elkarlanean.