Berria.info

Iruña-Veleiako aztarnategiko arduradunen aurka zabalik dagoen auzietako bat, Euskotren enpresa publikoak jarritako kereila, laster itxi liteke, fiskalak, auzia zabaldu aurretiko eginbideetan, salaketa artxibatzea eskatu baitu. Ministerioaren ordezkariaren ustez, bi enpresen artean sinatutako hitzarmenean ez da iruzurrik izan.

Euskotrenek eta Lurmen S.L. enpresak indusketa lanak hainbat urtez diruz laguntzeko hitzarmena sinatu zuten 2001ean, baina ezohiko idazkunak azaldu ondoren, Euskotrenek laguntza kentzea erabaki zuen. Arabako Foru Aldundiak eratutako adituen batzordeak idazkunak faltsuak zirela ebatzi ondoren, berriz, Eliseo Gilen enpresaren aurka iruzurragatik salaketa jartzea erabaki zuen Euskotrenek.

Orain arte egindako eginbideetan, epaileak bi aldeen frogak eta iritziak jaso eta entzun ditu. Fiskalak auzia ixteko eskaera egin ondoren, epailearena da, hain zuzen ere, azken hitza. Fiskalaren iritziarekin bat eginez gero, ez litzateke epaiketarik egingo. Veleiako arduradun ohien aurkako beste bi salaketa daude jarrita.