Berria.info

Gero eta indar gehiago hartzen ari dira gizon probak eskualdean. Jaien barruan, gaur arratsaldean jokatuko dira Legazpin. Manolo Agirre da Legazpiko taldeko botileroa.

Urte askoan bat bera ikusteko aukerarik ez da egon; 2007an, ordea, Zumarragan egin zuten. Eskualdeko seigarrena egingo dute gaur Legazpin (Gipuzkoa) Santikutz jaien barruan arratsaldeko 19:00etan, eta herrian egiten duten lehena izango da. Manolo Agirre da Legazpiko taldeko botileroa.

Herritarren aurrean duzuen maila erakusteko prest al zaudete?

Bai, gogoz itxaron dugu eguna noiz helduko. Gogor lan egin dugu orain arte, eta daukagun guztia emango dugu irabazteko.

Zenbat denbora daramazue prestatzen?

Iazko irailean hasi ginen, 2008ko abenduan Zumarragan egin genuen saiorako, eta ordutik ez gara gelditu. Ordu asko pasatu ditugu entrenatzen, bai taldean bai bakoitza bere kabuz. Entrenatzeko tresna berezi bat egin dut, eta bestela lau taldeok erabiltzen dugun kaxa erabili izan dugu taldean entrenatzeko, eta horrekin ezin zenean harriarekin entrenatu dugu. Gero bakoitzak bere entrenamenduak ere egin ditu korrika, mendian, kiroldegian eta abar.

Eskualdean zuek izan zarete taldea sortzen azkenak. Nolatan animatu zineten?

Batek baino gehiagok esaten zuen legazpiarrok falta ginela taldea osatzeko, eta zirika hasi zitzaizkigun. Orduan herrian mutil batzuk animatu eta niri botilero izateko proposatu zidaten. Herriko mutil talde horrek erabaki zuen taldea sortzea.

Zumarragan ospatu zen lehen saio hartatik seigarrenera heldu dira gizon probak eskualdean.

Gaztetan Zumarragan eta Urretxun gizon probetan ibiltzen ziren batzuek herriko gazte talde bat animatu zuten, eta horrela hasi zen dena. Gero eta gehiago entzuten dira orain gizon probak, eta nik uste saio gehiago egiten jarraituko dugula.

Legazpira etortzekoak ziren bizkaitarrek huts egin dute azkenean.

Amorotoko eta Barakaldoko talde bana etorri behar zen, baina pisu arazoak direla-eta ezetz esan dute azkenean.

Zein dira pisu arazo horiek?

Arauen arabera, zazpi partaidek osatutako taldeak egin behar dio tira harriari, eta zazpi partaide horiek ezin dute 583 kilo baino gehiago pisatu. Esan zutenez, beraien kasuan ezinezkoa zen kilo horien barruan sartzea eta azkenean ez dira animatu. Hala ere, azkenean proban parte hartuko dugun lau taldeak ere nahiko estu ibili gara pisuarekin, eta proba aurretik pisatu egingo gara berriro, badaezpada.

Orain arte hamabi partaideko taldeak eta 1.700 kiloko harria erabili dituzue. Oraingoan ere bai?

Ez, kasu honetan zazpi lagun arituko dira harriari tiraka, eta harriak 925 kilo pisatzen du. Orain arte plaza bakoitzak 36 metroko luzera zuen, eta oraingoan 28 izango ditu. Zumarragako plazan zorua galtzada harria da, eta hemen brearen gainean egingo dugu. Ez dakigu nola irtengo den, denetariko iritziak baitaude, baina nik uste dut brea samurragoa dela.

Herrian egiten den lehen proba izango da. Zein da helburua?

Helburu nagusia da 30 plaza egitea eta irabaztea. Irabaztea ez da erraza izango, gainontzeko taldeak oso indartsu baitaude. Gu baino denbora gehiago daramate saltsa honetan sartuta, eta horrek badu garrantzia. Hala ere, seguru gaude herritarren animo oihuek ere helburu nagusi horretara heltzen lagunduko digutela.

Gizon probak mutilei eskatzen dien esfortzua kontuan hartuta, garrantzitsuak al dira herritarren eta gertukoen animoak?

Uste baino gehiago. Ordu asko ematen dituzte mutilek entrenatzen, eta horrek meritu handia du. Ez dute inolako ordainsaririk jasotzen, gogoko dutelako egiten dute, baina ingurukoak aspertu ere egin daitezkeela kontuan hartu behar da. Askok seme-alabak ere badituzte, eta emazteek eta neska-lagunek pazientzia handia izan behar dute. Eskertzekoak dira proban bertan jasotzen ditugun animoak eta aurretik jasotakoak, etxekoenak eta herritarrek kalean ematen dizkigutenak.

Animatzen asko ibiltzen dira; baina apusturik egiten al du jendeak?

Gure artean ez dugu egin, talderen batek-edo agian egin zuen, baina ezer ofizialik ez. Hala ere, inguruko herrietan, Urretxun, Legazpin eta Zumarragan badakigu apustuak egin dituztela, eta Goierrin ere bai, entzun dugunez Seguran eta Zegaman egin dituzte.