Berria.info

2008-01-31

«Xumea baina edertasunez josia da Nora aldizkaria», adierazi zuen atzo Imanol Agirrek, Nora aldizkariko zuzendariak. Izan ere, euskarazko lehen bidaia aldizkaria aurkeztu zuten atzo, Sua edizioen eta EKT Euskarazko Komunikazio Taldearen elkarlanari esker. Gonbidatu guztiak aldizkariaren lehen alearekin erabat harrituta geratu ziren. Eta arrazoiak ez dira falta. Irudi ikusgarriak eta kalitate handiko testuak ditu bidaia aldizkariak. Hilero hainbat norabide erakutsiko ditu bere orrietan, eta askoren bidelagun izango da aurrerantzean.

«Bidaien gaineko hausnarketa egiteko tresna izango da, eta horretarako, hainbat atal izango ditu aldizkariak», azaldu zuen Agirrek. Proposamen praktikoak emango zaizkio irakurleari. Irudiak, fitxak... material grafiko ugari izango du, irakurlea harritzeko. Horrez gain, memoriaren mapa zabalduko du Nora-k, urte askotako tokiek duten magia erakutsiz. Lan talde handia dago aldizkariaren atzean, eta guztiek ahalegin berezia egin dute proiektua aurrera eramateko. Joan Mari Larrarte EKTko kontseilari ordezkariaren esanetan, euskarazko irakurzaletasuna bultzatzeko erronka handia abian da.



«ITXURA ONA». Aurkezpen ekitaldira etorri zirenen iritzia berdintsua izan zen, guztiek itxura ona zuela esaten baitzuten. «Irakurtzeko erraza da, eta oso itxura ona du», azaldu zuen Ander Izagirre kazetari eta bidaiariak. Bigarren alerako testu bat idatzi du berak, eta oso pozik agertu zen. «Testu praktikoak eskainiko ditu aldizkariak eta jendeak gustura hartuko duela uste dut». Izagirrek bidaia ugari egin ditu eta bere esanetan, kanpoan toki ederrak badira, baina etxetik gertu ere aurki daitezke.

Josu Iztueta bidaiaria ere oso pozik agertu zen aldizkariarekin. «Bost urte behar izan dira Nora sortzeko, baina azkenean kalean da, kalitate handiarekin, gainera. Lehen alea mehea bada ere, gizentzen saiatuko gara». Hurrengo aleetan idazteko prest azaldu zen eta jendeak harrera ona egingo diola uste du. «Jendeak gustukoa ditu aisialdiarekin lotutako lanak».



«IRAKURTERRAZA». Markel Olano Gipuzkoako ahaldun nagusiak itxura ona hartu zion aldizkariari. «Lehendik Euskal Herria aldizkariak lan handia egin du, eta orain, Nora-k bere ibilbidea egin behar du. Euskal kulturan beste pauso bat da, eta jendeak gustukoa izango duela iruditzen zait». Olanoren aburuz, jendeak geroz eta produktu bisualagoak nahi ditu, eta horren aurrean, Nora-k ikusgarritasuna eskaintzen du.

Komunikabideen arloko jende ugari gerturatu zen aurkezpenera. Horien artean, Odile Kruzeta, Euskadi Irratiko zuzendaria zegoen. «Itxura oso ona du aldizkariak, oso polita da. Euskal Herria aitzindari izan zen, eta orain lehen euskarazko bidaia aldizkaria kalean daukagu. Euskaldunok mendizaletasunaren gaia gustukoa dugu, beraz, aldizkariak harrera ona izango duela uste dut».

Aurkezpenean jende ugari bildu zen, arlo ezberdinetakoak, gainera. Bertan izan ziren, Santiago Yaniz argazkilaria, Klara Badiola aktorea, Amaia Agirre eta Mirari Martiarena bertsolariak, Urtzi Urrutikoetxea kazetaria... Guztiek Nora ezagutu nahi zuten. Dagoeneko lehen bidaia egina du Nora-k, baina, aurrerantzean, beste asko egiteko prest izango da.