Berria.info

Otsaila da Gaztemaniak!-en etorkizuna zehazteko Gipuzkoako Diputazioak jarri duen hilabetea. Egitaraua bertan behera uzteko erabakia atzera bota eta 2010ean ere «zenbait kontzertu» egingo direla bermatu ostean, kopuruak zehaztea falta zaio foru instituzioari. Horretarako, Gaztemaniak!-en parte hartzen duten herrietako udalekin -gehienekin, behintzat- harremanetan jarri da Haurren eta Gazteen Atala, haien asmoak ezagutze aldera, eta taldeak kontratatzen hasteko agindua eman du.

Udal batzuk ustekabean harrapatu ditu Diputazioaren jarrera aldaketak, Gaztemaniak! aintzat hartu gabe osatu baitzituzten 2010eko aurrekontuak, baina, hala ere, gehienak prest dira kontzertuak hartzeko iazko diru kopuru bera jartzeko. Donostiaren kasuan, Udaleko Gazteria Atalaren ekarpena 10.000 eurokoa da, urtean bi kontzertu antolatzeko. Gainerako udalek ere -Arrasate, Hondarribia, Oñati eta Zarautz- bi kontzerturen finantzaketa hartzen dute beren gain, baina 6.000 euro jarrita. Diputazioak beste bi kontzertu ordaintzen ditu herri bakoitzeko.

Udal guztiek egitarauaren «oso balorazio ona» egiten dute, bai Gaztemaniak!-en kultur eskaintzari dagokionez, bai herritarren erantzunari dagokionez. Arrasateren, Hondarribiaren eta Zarautzen kasuetan gainera, gazteek kudeaturiko aretoen eta instituzioen arteko harremana eta elkarlana sustatzeko aukera eman duela nabarmendu dute herriotako Gazteria teknikariek.

Arrasate

Arrasateko Udala da oraindik Gaztemaniak!-en segituko duen erabaki ez duen bakarra. Egitaraua bertan behera geratuko zelakoan itxi zituen 2010eko aurrekontuak, eta Diputazioaren jarrera aldaketak egoera birplanteatzera eraman du.

1994tik, Gaztemaniak!-en sorreratik, hartu du parte Arrasatek egitarau horretan; «orduan, kontzertuak eta beldurrezko zinema maratoiak antolatzen ziren, gehienak Amaia antzokian», Udaleko Gazteria teknikari Blanka Jauregik gogoratu duenez. Antzokia eraberritzeko lanak zirela eta, kolaborazioa eten zen hainbat urtez, baina 2008an berreskuratu zuten. Bigarren aro honetan gaztetxean egin dira Gaztemaniak!-eko kontzertuak, eta Jauregik alderdi hori azpimarratu du. «Diputazioaren, Udalaren eta gaztetxearen arteko elkarlana ekarri du, eta hori interesgarria iruditzen zait. Instituzioen eta gazteen artean dagoen distantzia murriztu nahi bada, ondo dago Gaztemaniak! eta halako tresnak izatea». Jauregik nabarmendu du Gaztemaniak!-ek gaztetxera publiko «plurala» eraman duela, Arrasateko taldeei gonbidatu gisa jotzeko aukera eman diela eta hiru aldeek elkarlanaren balorazio «ona» egiten dutela.

Hala ere, Udalak erabakitzeke du «parte hartzen jarraituko duen eta zein baldintzatan». Jauregiren iritziz, Gaztemaniak!-ek «kalitateko kultur proposamenak» egiten jarraitu beharko luke, Udalentzat «jasangarriak» diren aurrekontuekin -«kontuan izan udaletako gazteria sailek aurrekontu txikia izaten dutela ikuskizunak antolatzeko, gastuaren zati handiena ekipamenduetara bideratzen baita»-, eta kontzertuen sarrera merkeari eutsi beharko lioke.

Donostia

Donostiako musika eskaintza bateratu nahi duen egitasmo zabalago batean ari da lanean Udala, eta horri lotuta dago Gaztemaniak!-en etorkizuna hirian, Denis Itxaso Gazteria eta Kultura zinegotziak (PSE-EE) azaldu duenez. «Formatu txiki eta ertaineko areto publiko eta pribatuen programazioa uztartu eta eskaintza global bat plazaratu nahi dugu, Donostia hiri aspergarria eta zaharkitua dela dioen estereotipoa amaitzeko».

Plangintza horretan, Gaztemaniak!-ek «nola edo hala» iraun beharko lukeela dio Itxasok, «kultur proposamen berezia delako. Gure hirian mundu osoko artista handiak 7 eurotan ikusteko aukera ematen du, kalitatea bermatzen du, publiko finko eta fidela sortzen du, eta hemengo musika taldeak sustatzeko plataforma egokia eta erabilgarria da. Beraz, helburuak betetzen ditu Gaztemaniak!-ek».

Hondarribia

Hondarribiak ibilbide laburra egin du Gaztemaniak!-en, 2008an hasi baitzen egitarauan parte hartzen. Psylocibe elkarteak kudeatuko Psylocibenea aretoa zabaltzearekin batera, Udalak ikusi zuen aukera ona zela berak bakarrik antolatu egingo lituzkeen kontzertuak egiteko. Arrasaten bezala, gazteen, Udalaren eta Diputazioaren arteko elkarlana ahalbidetu du Gaztemaniak!-ek, eta balorazioa «oso ona da». «Kontzertuek oso harrera ona izan dute, eta Psylocibe elkarteko gazteak oso pozik daude», adierazi du Maite Pelaez Ongizate eta Gazteriako zinegotziak (EAJ). Hortaz, zuzenean Diputazioaren asmoen berri jaso ez badute ere, 2010erako diru multzo bat gorde du Udalak Gaztemaniak!-eko ekitaldietarako, aurreko urteetako kopuru bera, 6.000 euro.

Hala ere, aurrekontu murrizketa dela-eta Gipuzkoako Diputazioko Gizarte Politikako Departamenduak Gaztemaniak! bertan behera uzteko hartu zuen erabakia «ulergarria» dela zehaztu du Pelaezek, eta horren aurrean begi onez ikusiko luke herri bakoitzak bi kontzertu antolatu beharrean bakarra izatea eta gastu guztiak Udalak bere gain hartzea.

Gaztemaniak!-ek sorreran beste helburu batzuk zituela gogoratu du Hondarribiko zinegotziak: «Gipuzkoak taldeen kontzertuak antolatzeko sortu zen, baina, urteak pasa ahala, beste norabide bat hartu du, eta ondo funtzionatu du, hori egia da». Alde horretatik, une hau egokia izan liteke egitaraua birplanteatzeko, «zertarako jaio zen eta zer bihurtu den aztertu, eta zertan hobetu daitekeen pentsatzeko».

Oñati

Sorretatik Gaztemaniak!-en parte hartu du Oñatiko Udalak, eta Donostia eta Zarautzekin batera, kontzertu gehien hartu dutenetako bat da. 2010ean jarraitzeko asmoa du, aurreko urteetako diru kopuru bera jarrita. Diputazioak egitarauari diru laguntza kentzeko erabakia hartua zuela jakin zutenetik, kezka handiz jarraitu dute auzia. Mikel Iturrospe Haur eta Gazteak saileko zinegotziaren iritziz (EAJ), «programazioaren kalitateari eutsiz saio gutxiago antolatzea» izan daiteke egungo egoeratik ateratzeko «behin-behineko irtenbide bat». Etorkizunari begira, ordea, «udalen inplikazioa mantendu eta Diputazioarekin elkarlanean aurrekontu propio bat finkatu beharko litzateke, kulturaren arloan Gaztemaniak! osagai garrantzitsua dela onartuta!», adierazi du Iturrospek.

Zarautz

Zarautzek ere ibilbide luzea egin du Gaztemaniak!-en, kontzertuak hartzeko leku egokirik ez izan arren. Gaztelekuan egin dira ia denak, baina iaz Putzuzulo gaztetxea ere erabili zen emanaldi baterako, The Wave Pictures taldearen kontzerturako, hain zuzen ere. Kasu honetan ere gaztetxearen eta Udalaren arteko «harremanak estutzeko» balio izan du Gaztemaniak!-ek, Onditz de Leizaola Gazteria teknikariak azaldu duenez. Hortaz, egitaraua bertan behera uzteko asmoa zela eta, kexak jaso dituzte; «jarraitzaile sutsuak daude hemen ere».

Egitarauan parte hartzen jarraitzeko asmoa du Udalak, «agian diru gutxiago jarrita, guk ere murrizketak ditugunez», baina egitasmoak «agian moldaketa batzuk beharko lituzke», De Leizaolaren iritziz. Andoni Ibarguren Gazteriako zinegotziak (Aralar) udalen parte-hartzea areagotzea proposatu du. «Kontzertuak planifikatzeko orduan, Gaztemaniak!-ek proposamen bat egiten digu, eta guk onartu edo atzera botatzen dugu. Guk zeresan handiagoa beharko genuke izan plangintza horretan, eta udalen artean ere koordinazio gune bat sortzearen aldekoak gara».