Berria.info

2009-06-16

Juan Martinez de Irujo oporretan da egun, eta hobe du atseden hartzea, ekain bukaera latza izango baitu. Herri guztietan nahi dute txapelduna, Asperi gehien eskatzen dioten pilotaria da, eta sei partida jokatuko ditu hamar egunean. Ostiralean itzuliko da jaialdietara, hilak 19, Urrestillan. Hilaren 21ean Arrasaten jokatuko du; 24an, San Joan egunez, Eibarren; 26an, Sopelan, eta 29an, Mungian. Partida askotan Mikel Beroiz izango du alboan, eta litekeena da sanferminetako ferian ere bikote egitea. Horiek ezker-paretako partidak dira, 27an Baionako Modernean jokatuko baitu, Xalarekin, Ibarrola eta Ozafrain binakako txapeldunen aurka. Jaialdia Seaskak antolatu du, 40. urtemuga dela eta.

Buruz buruko txapeldunak partida jokatuko du uztailaren 5ean ere, lau t'erdian, San Fermin torneoko Aspeko adarreko finalean. Egitura telebista eta Udalarekin ziurtatzeko badago ere, enpresaren asmoa hiru kanporaketa jokatzea da. Lehena Olazabalek eta Zubietak jokatuko lukete, irabazleak Beroiz izango luke zain, eta Irujo litzateke adarreko azken maila.