Berria.info

San Miguel ligako klubak entrenatzen hasi dira jada, eta ia-ia osatu dituzte hurrengo urterako taldeak. Arraunlarien mugimendua ez da handia izan aurten.

Bi hilabete ere ez dira bete arraun denboraldia bukatu zenetik, baina San Miguel ligako talde guztiak entrenatzen hasi dira jada. Aurrena, baina, koadrilak osatu behar izan dituzte klubetako kideek. Mugitu da, bai, azoka, baina pixka bat baino ez. Aurreko urteetako udazken batzuetan arraunlari saldoak mugitu izan dira, eta klub batzuek, Castrok eta Urdaibaik batez ere, ez dute inolako erreparorik eduki udazken bakarrean koadrilaren erdia aldatzeko. Hurrengo sasoian, baina, ez da aldaketa gehiegi izango San Miguel ligako ontzien tostetan; batzuk bai, baina gehiegi ere ez.

Bermeon, esaterako, aldatuko dira gauza batzuk. San Miguel ligaren azken bi urteetako garaile Urdaibaik entrenatzaile berria dauka, adibidez. Patxi Bilbaok kargua utzi du, bere buruari presio handiegia jartzen diolako, eta Fran Gonzalez etorriko da ordezkatzera, Tirandik. Gainera, bost arraunlari titular ere galdu ditu Bou Bizkaia ontziak. Patroiak ere berriak dira: Fran Gonzalez bera eta Izortz Zabala jarriko dira ontziaren popan, Asier Zurinagaren eta Asier Aregoren partez.

Castrok, berriz, bi arraunlari eta bi patroi galduko ditu 2008ko koadrilarekin alderatuta, baina Santiago Lopez Bikuña patroi beteranoa eta Iurgi Iruretagoiena zumaiarra -Zumaian, Urdaibain eta Orion ibilitakoa- fitxatu ditu. Hain emaitza onak eman zizkion taldearen bizkarrezurrari eutsiko dio, hartara, Luis Mari Etxabe entrenatzaileak.

Arraunlari beterano dezentek utzi dute, berriz, Orioren trainerua. Horiek ordezkatzeko, Iñigo Arruti Txabola arraunean hasiko da berriro, eta Alain Colunga dator Ondarroatik. Hala, Joxean Olaskoaga Aizperro-k pare bat fitxaketa lotu nahi du.

San Pedro aldean, berriz, saltsa. Oraindik ere ez dago argi zer gertatuko den. Gaizka Garmendiak izan behar zuen entrenatzailea 2009an, baina uko egin zion horri, kargua hartu eta egun batzuetara. San Pedroren zuzendaritzak beste pertsona bat dauka begiz jota, baina oraindik ere ez du erabakirik hartu. Halere, hurrengo egunetan emango dute entrenatzaile berriaren izena.

Zarautzen, Kike Lopez izango da entrenatzailea, eta Jose Mari Mendizabalen lekukoa hartu du. Gabi Larrinaga eta Jose Mari Intxaustik, aldiz, kluba utzi dute. Enbata ontziari bere gustuko arraunketa eman nahi dio Lopezek, eta oraingoz lau dira arraunlari berriak; tartean Alain Osanbela, Zumaia utzitakoa. Hondarribira, berriz, arraunlari eskarmentudunak itzuli dira eta Ibon Etxeberria oriotarrak ere berea emango dio Mikel Orbañanosek zuzentzen duen ontziari. Zumaiaren taldea antzekoa izango da, baina gazte asko bildu ditu. Kaikuk, berriz, bost arraunlari fitxatu ditu -Aitzol Arrizabalaga ondarroarra, adibidez-, joandako beste bosten tokia betetzeko. Mugitu da azoka, baina pixka bat baino ez, beste urte batzuekin konparatuta.