Zuzendariari
Mapatik ezabatuak
Euskalgintzaren mapa direktorioa sortu du Kontseiluak. Bertan, euskararen normalizazioa lortzeko lanean ari diren elkarte eta erakundeak agertzen dira herriz herri. Bi urte lanean aritu ondoren, lankidetzan osaturiko tresna dela zioen Xabier Mendigurenek aurkezpen ekitaldian.
Neuk gonbita egin nahi dizuet www.euskalgintza.org helbidean direktorioan nabigatzeko eta konturatzeko aipatu elkarlana zeinekin gauzatu den.
Norberaren herrikoan murgiltzea izango da joera arruntena eta, honela, harriduraz, ikusi dut Lezon, azken hogeita hamar urteetan euskalgintzan, euskararen berreskurapen eta normalizazioa lortzeko herriak izan eta dituen eragile indartsu eta eraginkorrenak ez direla agertzen. Ez Lezo Herri Eskola, ez Lezo Institutua, ez Haur Eskola. Horratx! Kultur Elkartea, Oroitzene AEK eta Lizeo ikastola agertzen dira mapan.
Aldamenera joan eta, Errenterian, ikastetxe publikorik ez da agertzen, noski, baina Langaitz Ikastola ere ez, publifikatu zenean labela galdu zuen, nonbait.
Luza gaitezke Hondarribiko basamortuari azalpenak bilatu nahian, Irungo Txingudi Ikastolak, sare publikoan sartuta ere, aipamenik merezi ez izatea, edo, Donostiako kasuan, Elkar megadendei eskaintzen zaien pasarelan, diskoetxea barne, nazioartean, hizkuntza berreskurapenean, oso ezaguna den Amara Berri ikastetxeko fenomeno batentzat zirrikiturik ez dago. Eta honela herriz herri.
Kontseiluan galdetuta, Topagune eta Ikastolen Elkartearekin jarri omen dira harremanetan. Direktorioaren aurkezpenean, aurrerantzean, garatzen eta hobetzen jarraitzeko asmoa agertu zuten. Autoen erosketan bezalaxe funtsezkoa, oinarrizkoa, berezkoa du -«de serie»- bestelakoak aukerakoak dira.
Webgunean «erakunde berria eransteko» abiatzen den prozesua ireki daiteke baina, batzuek ordea, berezkoa dute labela; jaiotze unetik bataiatuak sortzen dira, apezpiku berriek ur bedeinkatua emanda; besteok, aldiz, jatorrizko bekatua aitortu, botoian sakatu eta penitentzia egin beharko dugu euskalgintzaren mapan lekua izateko.
Dinamikoa izango dela agindu zuen Zigor Etxeburuak; ohartzen hasiak gara, batzuk besteak baino gehiago mugitu beharko gara ordea.
Gu mapan bageunden norbaitek ezabatu arte. Hau ez da ez Elkarlana, ez Euskalgintza ez Herrigintza.
Jokin Mayo.
Lezoko Institutuko zuzendaria.Sexu-hezkuntzaz
Trinidad Jimenez izeneko ministroak eskoletan sexu-hezkuntza eskaintzearen aldeko iritzia adierazi du, 11 urtetik aurrera. Eta, hona, horretarako argudio modura adierazi duena: gaztetxoek, arlo horretan, oso informazio gutxi dute. Dirudienez, ezer gutxi dakite, ministroaren aburuz.
Gizartearen errealitateari begirada bat ematen badiogu, sexuaren eta beronen jardunaren presentzia nabaria da telebistan, zineman, publizitatean, bideo-jokoetan... Ondorioz, gaur eguneko 11 urte inguruko gaztetxoek izugarri dakite kontu horietaz. Begietatik sartzen zaielako. Informazioa badute eta ugari eduki, baina, zoritxarrez, oso modu desegokian daude prestatuak kontu garrantzi handiko honetan.
Izan ere, sexua erakusten zaie edonoiz, edonola eta edonorekin egin daitekeen zerbait modura. Haientzat, ez du inolako ondoriorik. Nahi denean egiten da eta kito. Hona, kontuaz ikusten dutena: «Egizu, eta topera, goza ezazu sexua. Zenbat eta gehiago hobe». Eta, ikuspegi horren ondorioa, argi baino argiagoa da: urte apur batzuk geroago, ikusi egin duten horretan jardutea.
Noski sexu-hezkuntza behar dela adin horretatik hasita. Erabat ados. Baina modu egokian emana. Hona, gogoeta labur batzuk: lehenengo eta bat, gurasoak arduratu behar dira, familian, seme-alabak trebatzen adin horretatik aurrera; bigarrena: eskolan ematen den hezkuntza, pertsonaren eta bere duintasunaren ikuspegi orokorretik eman behar da, eta ez sexuaren jarduera bera eta antisorgailuen ezaugarriak izanik gai ia bakarrak; hirugarrena: sexualitatea, barnetik sentitzen den afektibitatearen ondorio modura azaldu behar da. Eta azpimarratu, maitasuna bilakatzen den afektibitate horrek dakarrela, berezko ondorio modura, bestearenganako laguntza eta eskaintza.
Jose Andres Etxebarria Etxeita.
Laukiz.Osasuna lehenesten dugu
Aurreko astean Hernaniko Udaleko alderdi politiko batzuen ordezkariek atez ateko zabor bilketaren aurkako euren iritzia agertu zuten. Lehenik eta behin ekarpenok eskertu nahi nituzke, eta, bide batez, aukera hori baliatu atez atekoaren aldeko gure hainbat argudio aurkezteko.
Herrietako hondakinen kudeaketa ikuspuntu askotatik landu liteke: ekologia, ekonomia, kontsumo ohiturak... Horiek guztietatik garrantzitsuena gure osasuna iruditzen zaigu, Hernanin bizi garenon osasuna.
Egia da atez ateko bilketa egungo sistemarekin alderatuz gero ekologikoagoa, ekonomikoagoa eta zibikoagoa izan daitekeela. Eta Zubietan egin nahi duten errauste-plantarekin alderatuz gero, askoz ere ekologikoagoa, ekonomikoagoa eta zibikoagoa dela. Gainera, atez atekoa da Europatik eta Estatutik datozen betebehar legalak betetzen dituen sistema bakarra. Baina horiek denak gure iritziz atez ate egoteko bigarren mailako arrazoiak dira, lehena osasuna delako.
Adibidez, denok dakigu amiantoak minbizia eragiten duela. Hori dakigula ez dugu galdetzen ea merkeagoa den. Ja ez ditugu amiantozko sabaiak nahi gure etxeetan, hain zuzen gure osasuna babesteari ematen diogulako lehentasuna.
Gauzak horrela, eta, datu ofizialen arabera, egungo sistemetatik, atez atekoa da jendearen osasunari kalte egiten ez dion bakarra. Horregatik aukeratu dugu bilketa sistema hori Hernanirako, ikuspuntu ekonomikotik, politikotik, ekologikotik eta, batez ere, osasunaren ikuspuntutik, defendatzeko moduko sistema bakarra delako.
Ezin dugu arnasten dugun airea eta edaten dugun ura pozoitzen jarraitu. Ezin dugu foko toxiko bat itxi, San Markoseko zabortegia, Zubietan beste foko toxiko handiago bat, errauste-planta, jartzeko. Beste bide bat ibili beharrean gaude, eta beste bide hori etxerik etxe, aterik ate, gauzak ondo egitetik hasten da.
Izaskun Txintxurreta.
Hernaniko ingurumen zinegotzia.Albisterik...
Irakurrienak
Bozkatuenak
-
1
-
2
-
3
-
4
-
5
Irakurrienak
© Berria.info - Euskal Editorea S.L.
Martin Ugalde Kultur Parkea, Andoain 20140 43.223785 -2.014929
Telefonoa: 943 304 030 / Faxa: 943 590 172
Laguntzaileak:
