Berria.info

2009-10-01

Hitz beste

Anjel Lertxundi

Zutabeak-eta ez dira espazio egokiak jendearen deiturekin-eta txantxak egiteko, baina salbuespen bat egingo dut gaurkoan eta zilegi bekit BBVAko Goirigolzarri jauna Guri gol sarri bihurtzea. Bera bankuko kontseilari delegatua izan da orain arte, eta dimititu egin du, baina ez ordainsaririk gabe: hiru milioi euroko pentsioa kobratuko du urtero. Milioi laurden bat euro hilero. Zortzi mila eurotik gora egunero-egunero. Niri dagokidanez, kontutxo bat daukat banku berean -mila euro inguru dauzkat bertan-, eta bankuarekin lotuta nago beste hamaika urtez hilero ordaintzen ari naizen hipoteka bati esker. Eta atzo goizean periodikoetan irakurri nuenean zer kobratuko duen nire kontseilari delegatuak, zenbakiak dantzan hasi zitzaizkidan, eta baita letrak ere, eta irakurleari ez zaio hain harrigarria egingo jendearen deiturekin txantxarik ez egiteko araua hautsi izana.

Esandakoa: guri gol sarri.