Berria.info

Zuzendariari

Azken hamarkadetan Mendebaldeko herrialdeetan gertatu den «hazkunde» ekonomikoa amaitu da. Amaiera hori, aurreikusten zen bezala, abiadura bizian zihoan tren baten deskarrilatzea bezala izan da, bortitza. Hala ere, bortitzagoa da hazkunde horren ondorioz gizarte patriarkatuak sortu dituen desberdintasun, lehiakortasun eta erailketa guztiak. Erailketak bai, erailketak diogu, milaka eta milaka pertsonaren zuzeneko zein zeharkako erailketak. Zuzenekoak, sistema madarikatu honen «hazkundea» bermatzeko asmoz sorturiko eta bultzaturiko gerrengatik. Zeharkakoak, gizaki zein ama lurraren eskubideen gainetik kapitala aurre jarri delako. Merkatu librearen izenean, mundua bera txikitu eta milioika pertsonaren etorkizuna zapuztu delako. Esklabotza bukatu dela behin eta berriz dioten berberek bultzatzen dute egungo esplotazioa. Merkatu librearen izenean, ume, emakume eta txiroen bizi-baldintzak garai bateko esklabotzaren antzekoak dira, euro baten truke bizi oso bat lanean. Hipokrisiaz beteriko mundu ilun honetan, koloredun gorbatak dituzten horiek, luxuzko jauregietan biltzen diren horiek, dituzte eskuak zikinen, beren irribarre horiek argazkian ateratzen dituzten berberak. Kapitalismoa txikitzailea da: kapitalismoak berak desberdintasunak eta injustiziak dakartza, amaigabeko hazkunde eta esplotazioan oinarritzen baita. Lehiakortasuna, hazkundea, abiadura eta desarrollismoa positiboak diren atributuak direla sinetsarazi digute gezurraren erreinuko jauntxoak direnak. Bitartean, guk, horren gainetik gizaki, herri eta ama lurraren eskubideak zenbakien, lehiaren eta abiaduraren bidez neurtzen ez direla diogunok, ez omen dakigu ezer. Ez omen dakigu zeintzuk diren gizartearen beharrak, eta, beti bezala, herriak ez gaituela aukeratu esango digute. Haiek, ordea, herriaren boza omen dira, eta nahi dutena egiteko legitimatuak daude. Demokrazia liberala itxura apaineko sagar ustela da, hiritarrek beren gestio eta interes pertsonalerako ematen dugun txeke zuria.

Guk, herriak kolore anitzeko mundu batean ikusi nahi ditugunok, interes kolektiboetan sinesten dugu. Jende eta herrien bizitza gerra baten interes ekonomiko estrategikoen gainetik daudela azpimarratu. Ez dago petrolio ezta koltanik guda bat egitea merezi duenik. Diruaren gainetik gu gaudelako, gauzak beste modu batean egiten hasteko garaia delako. Irribarre faltsuko gorbatadun horiek sartu gaituzten krisialditik ez gaituzte beraiek aterako. Herriek, munduko kolore anitzetako herriek, gauzak beste modu batera egiteko ordua dela ozen esan behar dugu. Zuri-beltzeko, zementuzko mundu honetatik haratago gizaki, herri zein ama lurraren eskubideak errespetatuko dituen mundu koloreduna nahi dugu. Horregatik, egun hauetan, Betleemen elkarturiko Munduko Gizarte Foroak mobilizaziorako egin zuen deialdiarekin bat egiten dugu, bestelako mundu bat sortzea ezinbestekoa delako.

Ibai Iriarte San Vicente.