2011-07-20
Pertsonaia. Zigor Etxeburua
Gipuzkoako Euskara zuzendari
AINARA ARRATIBEL
Gipuzkoan euskaraz bizitzea erraztea eta bermatzea izango da datozen lau urteetan izango dugun erronka nagusia». Zigor Etxeburuak (Donostia, 1970) xede horrekin hartu du Gipuzkoako Foru Aldundiko Euskararen zuzendari kargua. Atzo jakinarazi zuten Etxeburuaren izendapena.
1994tik 2001era bitartean AEKn aritu zen lanean Etxeburua. Hasieran irakasle lanetan jardun zuen, eta gero baita didaktikari lotutako arduretan ere. 1999an Uruguain egon zen, euskara ikasteko eskola trinkoak ematen.
AEK utzi, eta Euskararen Gizarte Erakundeen Kontseiluan hasi zen beharrean 2001ean. Azken urte hauetan herrietako hizkuntz politikaren jarraipenaz arduratu da Etxeburua. Euskaraz Bai dinamika herrietara eramaten aritu da. Hala, ondo ezagutzen ditu Gipuzkoako udaletako hizkuntz politikak. Donostiako Udalarena aztertu du azken urteetan. «Pozik eta ilusioz» hartu du kargua. «Zabaldu berri den aro honetan denek dugu zer emana. Proposatu zidatenean, ez nuen zalantzarik egin». •
