Berria.info

Epaileak legezkotzat jo du gaur arratsaldean Donostian egitekoa duten manifestazioa. Espainiako Auzitegi Nazionaleko Fernando Andreu epaileak ez du arrazoirik ikusi martxa debekatzeko. Hala, bizkar eman die Auzitegi Nazionaleko Fiskaltzari eta Dignidad y Justicia salatzaileari. Manifestatzeko askatasuna bermatu behar dela gogorarazi die epaileak, eta nabarmendu du deitzaileak zein diren adierazita bakarrik ezin dela ondorioztatu delitua egingo dutela. Hala ere, elkarretaratzea zaintzeko agindu dio Ertzaintzari, eta, deliturik badago, esku hartzeko. Bulebarrean hasiko dute protesta, 17:30ean, Euskal Herriaren eskubideen alde lelopean.

Dignidad y Justiciak salaketa jarria zuen auzitegian, donostiar talde batek deitutako manifestazioa debekatzeko eskatuz. Haren arabera, «terrorismoa gorestea» da martxaren helburua. Horren erakusgarritzat jo zuen deitzaileak «Batasunaren hurbilekoak edo hari lotutakoak» direla eta aurreko urte zenbaitetan istiluak izan direla Donostian. Poliziari txostenak eskatu, eta Fiskaltzak bere egin zuen debeku eskaria. Bermetzat, Ertzaintzaren, Guardia Zibilaren eta Espainiako Poliziaren txostenak aurkeztu zituen.

Epaileak, ordea, ez ditu aintzat hartu. Manifestaziorako eskubidea oinarrizkoa dela gogorarazi du, atzo bazkalondoan kaleratutako autoan. Horren erakusgarri, Espainiako Auzitegi Konstituzionalak eta Giza Eskubideen Europako Auzitegiak ezarritako jurisprudentzia ekarri du gogora. Horien arabera, ideiak jendaurrean adierazteko aukera bakanetakoak dira manifestazioak, eta adierazpen askatasunaren zutabeetakoa da horretarako eskubidea.

Hartara, hura debekatzeko «arrazoi sendoak» behar dira. Epaileak ez du horrelakorik ikusi salaketetan. Dioenez, Poliziaren hiru txostenetan deitzaileen datuak soilik ageri dira. Ezker abertzaleko hautagai izan direla, besteak beste: «Datu horiek emanda soilik, ezinezkoa da eskubide hori [manifestaziorakoa] mugatzea».

Eusko Jaurlaritzako Herrizaingo Sailari ere keinua egin dio epaileak. Gogorarazi du gobernuari dagokiola manifestazioak-eta debekatzea. Horiek egiteko baimena hari eskatzen zaio. Herrizaingo Sailak ez du arrazoirik ikusi Donostiako martxa galarazteko. «Bistakoa da: gobernuak antzeman bazituen delituren bat egiteko zantzuak, ekitaldia debekatu ez ezik, horren berri emango zion botere judizialari, horretarako betebeharra duenez gero». Ez da horrelakorik gertatu, eta epaileak dio ez duela zertan martxa debekatu. Are, epaileen lana eginiko delituak epaitzea dela dio. «Eta ez delituei aurre hartzea, hori Estatuko beste erakundeei dagokie».

«Dispositibo berezia»

Debekatzeko arrazoirik ikusi ez arren, Andreu epaileak Ertzaintzari agindu dio manifestazioa gertutik zaintzeko. Poliziari esku hartzeko agindu dio, bi kasutan: legez kanpoko taldeak edo talde «terroristak» goratzen badituzte, edo «terrorismoaren biktimak» iraindu edo haiek umiliatzen badituzte. Hori saihesteko agindu dio Ertzaintzari, eta horretan parte hartzen dutenak identifikatzeko edo atxilotzeko. Gertatuaren berri Auzitegi Nazionalera bertara igortzeko eskatu du epaileak.

Epaileak autoa kaleratu eta minutu gutxira eman du Herrizaingo Sailak gaur hartuko dituen neurrien berri. «Dispositibo berezia» jarriko du Ertzaintzak Donostian, epailearen aginduak betetzeko. Hala, dei berezia egin die Herrizaingo Sailak manifestaziora deitu dutenei: «Une oro manifestazioa epailearen erabakiak eta legeak ezarritako mugen barruan egitea bermatu behar dute, legez kanpoko kartelak azaldu eta oihuak egin gabe».

Gainera, manifestazioaren ibilbidea aldatzeko agindu du Herrizaingo Sailak, «Donostiako Aste Nagusia hasteko ekitaldiak ez oztopatzeko». Amaiera lekua aldatu dute: Bulebarrean ez, Okendo plazan bukatuko da. Bulebarraren ondoan, Alderdi Ederren, 19:00etan botako dute Aste Nagusia hasteko kanoikada. Bi ekitaldiek bat egitea saihestu nahi dute.