Berria.info

Irudi bat mila hitz baino adierazgarriagoa izaten da. Eta, Bartzelonako Gracia Pasealekuaren itxurak ez du azalpen beharrik. Irmo erantzun zuen Kataluniak. Jendetza atera zen kalera. Ehunka mila lagunek esan zuten Estatutuaren kontra Espainiako Auzitegi Konstituzionalak herenegun argitara eman zuen sententziaren kontra daudela. Bartzelonako udaltzainek 1.100.000 lagun zenbatu zituzten; manifestazioa antolatu duen Omniun Cultural taldeak 1.500.000era biribildu zuen kopurua.

Espero zen jende andana biltzea. Ostegunerako 1.400dik gora erakunderen babesa zuen ekimenak. Baina, katalanek eta katalan ez diren askok erakutsi zuten, esperotakoa baino handiagoa izan zen. Litekeena da bezperan sententzia oso-osorik argitara eman izanak erantzuteko gogo hori indartzea. Zenbaitzuri probokazioa iruditu baitzaie ebazpenaren dituen 881 orrialdetako edukia aurreikusi baino hiru egun lehenago, justu manifestazioaren bezperan, publiko egitea. Baina, horrekin edo hori gabe, herriak emandako erantzunak balio du. Eta katalanek esan dute beraiek erabakitako eta onartutako Estatutua nahi dutela.

Manifestazioa 18:00ak jota abiatu zen Gracia pasealekuan barrena. Baina, ordurako, parte hartzaileetako askok ordubetetik gora zeramaten irteera puntuan. Herrialdearen luze zabaletik iritsi ziren 500 bat autobusek nahikoa lan izan zuten hango jende uholdea zeharkartzen. Mantso abiatu zen manifestazioa, oso mantso, independentziaren aldeko deiadarrek girotuta. Ordubetean ehun metro apenas egin zituzten.

Euskal ordezkaritza zabala

Guztien buruan 250 metro koadroko Kataluniako bandera eraman zuten. Haren atzetik joan ziren Jose Montilla Generalitateko presidentea, Ernest Benach Kataluniako Parlamentuko presidentea, Jordi Pujol eta Pasqual Maragall Kataluniako presidente ohiak eta Joan Rigol eta Heribert Barrera Parlamentuko presidentea ohiak. Som una nacion. Nosaltres decidim zioen haiei jarraitu zien pankartak. Alderdi politikoen ordezkariek izan zuten hura garraiatzeko ardura. Haien artean izan ziren Artur Mas CIUko presidentea, Joan Puigcercos ERCkoa, Manuela de Madre PSCko presidenteordea eta Joan Herrera ICVko idazkari nagusia, bai eta Kataluniako Gobernuko sailburuak eta udaletako alkateak ere.

Euskal Herritik ere ordezkaritza zabala joan zen Bartzelonara, besteren artean, euskal politikagintzako pertsonaia esanguratsu asko. Han izan ziren EAJko, ezker abertzaleko, EBko, EAko, Alternatibako, Aralarko eta Hamaikabateko ordezkariak. Baina, joan gabe gelditu zenik ere izan zen, eta hutsunea antzeman egin zen. Eusko Jaurlaritzak ez du ordezkaritzarik bidali Kataluniaren erabakitzeko eskubidea defendatzera.

Bildutako jendetzaren ondorioz aurrera egitea izugarri kostatu zitzaion manifestazioari, ezinezko bihurtu zen arte. Gracia pasealekua, Kale Nagusia eta inguruko kaleak erabat kolapsatu zituzten parte hartzaileek. Eta, azkenean, Tetuan kalean jarrita zuten helmugara ailegatu aurretik, bukaerako adierazpena irakurtzeko eskatu zieten antolatzaileek Txe Aranari eta Luis Solerri. Bi aktoreek Espainiako Auzitegi Kontituzionalaren sententzia gaitzesti zuten lehendabizi; eta Omnium Culturalen izenean guztiei eskerrak eman zizkieten gero, «historikoa» izan zelako herritarrek eman duten erantzuna. Kataluniako ereserkia abestuz eman zioten amaiera manifestazioari, eta milioitik gora parte hartzaileak hiriburuko kaleetan zehar sakabanatzen hasi ziren.

Antolatzaileek egindako modu berean, Kataluniako alderdi politikoetako buruzagiek ere herritarre ahalegina txalotu zuten, ekimena «sekulako arrakasta» izan dzela iritzita. Masek hitz horiexek erabili zituen balioespena egiterakoan. «Gaurko [atzoko]manifestazioa iragaren eta etorkizunaren arteko mugarria izango da Kataluniaren historian».

Lasaitasuna nagusi

ERCko Puigcercosen ustetan, jendea mindu egin du sententziak, eta sentipen horrek bultzatuta atera zen kalera. «Hemen daudenetako asko ez daude idenpendentziaren alde, baina, beste biderik ez dagoela ikusten ari dira».

PSCko De Madreren esanetan, «gaurkoa [atzokoa] PPren konstituzio aurreko Espainiaren kontrako manifestazioa izan da». «PPri konstituzio aurreko Espainia Estatua baino gehiago. Sekula ez zaie gustatu izan autonomiaz osatutako estatua».

Generalitateko presidente Montilla jendearen txistu artean eta babestuta eraman behar izan zuten manifestazioa bukatu baino lehen, parte hartzaile bat hari eraso egiten saiatu delako. Arratsaldeko tentsio une bakarra izan zen, ordea, lasaitasun giroa nagusitu zelako arratsalde osoan.