Berria.info

19 urteko emakume gazte bati eraso larria egin zioten ostiral goizaldean, Andoainen (Gipuzkoa), herriko jaien abagunean. Gaztea 07:00 aldera topatu zuten udaltzainek, erdialdeko kale batean. Eusko Jaurlaritzako Herrizaingo Sailak azaldutakoaren arabera, gaztea konorterik gabe zegoen, eta kolpatuta. Emakumeak zeuzkan zaurien ondorioz, ospitaleratu egin behar izan zuten.

Bere onera etortzean, gertatutakoa ondo gogoratzen ez zuela esan zuen gazteak. Ertzaintzak ikerketa hasi du, eta, lehenengo zantzuen arabera, «sexu erasoa egin diotela dirudi», Ertzaintzako iturriek BERRIAri adierazi diotenez; oraindik ez dute inor atxilotu. Atzo elkarretaratzea egin zuten Andoaingo udaletxearen aurrean, eraso sexista hori salatzeko.