Berria.info

EAEko Justizia Auzitegi Nagusiko administrazioarekiko auzien salak, ekainaren 17an kaleratutako epai baten bidez, kautelaz bertan behera utzi du Gipuzkoako Hondakinen Partzuergoko batzarrak Txingudiko Mankomunitatea partzuergoan sartu ahal izateko estatutuak aldatzeko hartutako erabakia. Auto horren ondorioz, beraz, Txingudi oraingoz ezingo da izan partzuergoko kide, eta partzuergoak ezingo du jardun Txingudiren inolako esparrutan. Auto hori 2009ko irailaren 21eko epaian oinarritzen da; izan ere, auto horrek partzialki indargabetu zuen Gipuzkoako Aldundiak martxoaren 15ean hartutako erabakia; hau da, partzuergoa eta haren estatutuak sortzeko hitzarmena arautzen duen erabakia.

Hala, epai horiek aintzat harturik, San Markoko Mankomunitateko kideen ustez, «pitzatzen» hasi da Hondakinen Partzuergoaren egitura: «Argi geratu da partzuergoaren egitura administratiboa gaizki egin dela eta pitzatzen ari dela. Porrot egin dezake». San Markok gogorarazi du partzuergoa goitik behera eraiki dela eta udalak ez direla kontuan hartu, nahiz eta hiri hondakinen kudeaketa udalerrien eskumen esklusiboa izan. «Tokiko autonomia oinarrizkoenari eraso egiten zaio».