Berria.info

Espainiako Gobernuaren inbertsio murrizketen ondorioz Sustapen Ministerioaren trenbide eta errepideetako lanak batez beste gutxienez urtebetez atzeratuko direla iragarri zuen atzo Jose Blanco Espainiako Sustapen ministroak. Espainiako Kongresuko Sustapen Batzordean eginiko agerraldian eman zuen horren berri Blancok, eta inbertsio murrizketa ahalbidetzeko lanen eskaintza berriak atzeratu, epeak luzatu, hasitako lanak behin-behinean geratu eta hainbat gauzatze kontratu ere bertan behera utziko dituztela jakinarazi zuen.

Ondorioak «lurralde osoan» izango dira, gainera, Blancoren arabera, datozen lau urteetarako iragarritako azpiegituren eraikuntza planak berriz ere programatzea ekarriko baitu horrek. Edonola ere, ez zuen xehetasunik eman murrizketek eragingo dieten azpiegitura zehatzen inguruan; orokorrean mintzatu zen Blanco.

Areago, Sustapen ministroaren arabera, azpiegituren eraikuntzari dagokionean, etorkizunean «ezer ez da berdin izango», inbertsioen murrizketek «2011tik harago ere ondorioak izango dituztelako». Momentuz, 2010. urtean gutxienez 3.200 milioi euro aurreztu beharko ditu Blancok gidatzen duen ministerioak. Eta beste hainbeste 2011. urtean, Espainiako Gobernuak iragarritako inbertsio publikoaren murrizketaren «egokitze handiena» Sustapen Ministerioak pairatuko baitu, Blancoren beraren hitzetan.

Egokitze horiek guztiek «inbertsio programa guztia berriro planteatzea» eragin dute, Blancoren esanetan. Izan ere, Sustapen ministroaren arabera, Espainia azken hamabost urtean hedapen ekonomikoa «agortezina» balitz bezala bizi izan da: «Egoeraren araberako diru sarrerak egiturazkoak balira bezala».

«Gehiago eraiki aurretik, dauzkagunei errendimendu hobea ateratzeko gai izan behar dugu». Beraz, beharrezkoak diren azpiegiturei lehentasuna emango diete, Blancoren hitzetan: «Ekonomiaren lehiakortasunari eta kohesio sozialari egiten dioten ekarpenagatik». Hala, trenbideak, abiadura handikoa eta konbentzionala, lehentasunak dira Blancorentzat. Aurrerantzean idatziko diren proiektuetan, baita egun idazten ari direnetan ere neurriak txertatuko dituztela iragarri zuen Blancok, besteak beste, errepideen, trenbideen, aireportuen eta portuen eskaeren eta ustiapenen aurreikuspenei buruzko analisia. Neurri horiekin, eskaeraren «benetako beharretara» egokitu nahi ditu inbertsioak Sustapen ministroak.

Hainbat proiektu murrizketetatik kanpo geratu dira, ordea. Inbertsio publiko-pribatuaren ezohiko planaren bidez egin daitezkeen lanak izango dira horiek, Blancoren arabera. Hau da, kapital pribatuaren lankidetzarekin abiaturiko proiektuak.

«Ipuinak»

Jose Blanco Sustapen ministroaren hitzak «ipuinak» dira EAJrentzat. Hala esan zuen Espainiako Kongresuko Sustapen Batzordean Jose Ramon Beloki EAJko parlamentariak. «Urtez urte, literatura saldu zaigu, lan publikoen proiekzioaren eta kontrolaren plan argi bat zegoela esanez». Gezurra esan izana leporatu zion, beraz, Belokik Blancori. Horregatik, bere alderdia «guztientzat zertxobait gutxiago» formularekin ez dela ados egongo aurreratu zuen.

Era berean, Belokik galdetu zuen nola den posible zalantzan uztea AHTaren moduko lan bat «1994an Europan lehentasunezko gisara izendatu zena eta eman dituen urrats guztiak eman dituena» kohesio sozialagatik eta arrazoi ekonomikoengatik.

Espainiako Sustapen Ministerioak esaten dituenak «inork» ez dituela sinetsi behar ere adierazi zuen Belokik. Harago ere joan zen, eta zera esan zuen: «Zalantza handiak ditut, izan diren jokamolde batzuk ikusita, norbaitek ez ote lukeen Fiskaltzara jo behar».