Berria.info

Datorren urteko udal eta foru hauteskundeetan Nafarroa Bai koalizioan jarraitzearen alde egin du Aralarren batzarrak, gehiengoz. Iruñean egin du batzarra, eta %92k bat egin dute koalizioaren alde, 2011n Nafarroako «aldaketa politikoa» bermatuko duelakoan. Halaber, alderdikideek Aralarreko zuzendaritzari eskatu diote giza eskubideen eta bide politikoen alde egiten duten alderdiekin akordioak sina ditzala Nafarroak egitasmo politiko «demokratikoa, aurrerakoia eta abertzalea» izan dezan.

Hurrengo hauteskundeei begira abertzaleek «proposamen ona» egin beharko dute, erakundeak eskuratu nahi badituzte, Patxi Zabaleta Aralarreko koordinatzaile nagusiak adierazi duenez. Haren irudiko, Nafarroak «aldaketa sakona» behar duela erakutsarazi du UPNk, eta aukera hori baliatu behar dute alderdi abertzaleek, emaitza onak lortu nahi badituzte. «Proposamen politiko sinesgarria, zintzoa eta ona egin behar dugu».

NaBai koalizioaren egitura aldatzeko proposamena eztabaidatzen ari dira Aralarreko kideak egunotan. Horren arabera, Aralarrek NaBaiko zuzendaritzako organoetan %40ko ordezkaritza eskuratu nahi du, Gara-k atzo jakinarazi zuenez.