Berria.info

Otsailaren 27an eta 28an egingo dute Usurbilen (Gipuzkoa) hiri hondakinen kudeaketari buruzko herri galdeketa. Hala jakinarazi zuen Xabier Mikel Errekondo Usurbilgo alkateak atzo. Honako hau izango da galdera: Zein bilketa sistema nahi duzu Usurbilerako? Hiru erantzun izango dituzte aukeran herritarrek: atez ate; orain arteko edukiontzien sistema (4 edukiontzi); edo orain arteko edukiontzien sistema + 5. edukiontzia organikoarentzat.

Herri galdeketaren egunetan, 10:00etatik 20:00etara bitarte, zabalik egongo dira bozkalekuak, eta, orotara, sei mahai jarriko dituzte «herriko auzo guztietan»: bi herriko kaskoan eta bana Kalezarren, Santu-enean, Aginagan eta Zubietan. Errekondok jakinarazi du herri galdeketaren prozedura urtarrilaren 26ko udalbatzarrean onartzea espero dutela.

Parte hartzeko deia

«Demokrazia zuzenaren ariketa bat izango da» Errekondoren arabera, eta «esandakoa bete» egingo dutela adierazi du, «nahiz eta zenbaitek, asmo txarrez, zalantzan jartzeko ahalegin guztiak egin dituzten».

Ariketa horrek, gainera, «berretsi egingo du orain arte egindako lana», Errekondoren ustez. Hala, Usurbilgo herritarrak bozketan parte hartzera deitu ditu, «etorkizuna nolakoa izango den kontsulta horretan erabakiko baita». Errekondoren hitzetan, «hau da benetako unea, bestela, orain arte egindako lan guztia zakarrontzira» joango baita.