Berria.info

«Poloak eta beste deitura horiek» ez dira Aralarren hizkuntza politikoan sartzen. Zabaletaren irudiko, erabaki ahalmenaren eta «herri honetako ondareen» defentsa hitzartu behar dute abertzaleek. Ez besterik.

Nafarroako 2011ko hauteskundeen azken eztabaida amaitu ondorengo egunean, asteazkenean, hartu zuen Patxi Zabaletak (Leitza, 1947) BERRIA Aralarren Iruñeko egoitzan. Uztailean, Alfredo Perez Rubalcaba Espainiako Barne ministroarekin Uxue Barkosek eta berak izandako bileraz eta Batasunaren barne eztabaidaz gogoeta egin du Aralarreko koordinatzaileak. Zabaletak argi du «poloak eta beste deitura horiek» ez direla Aralarren hizkuntza politikoan sartzen, eta alderdi abertzaleek elementu komun batzuetan bat egin behar dutela uste badu ere, argi du hortik ez dela indar politiko bat sortuko.

Nola sortu zen Perez Rubalcabarekin Madrilen egindako bileraren hitzordua? Noren ekimena izan zen?

Rubalcabaren ekimenez izan zen. Bilera ohikoa izan zen, eta ez zen Espainiako Gobernuko ordezkariekin egindako lehena. Aurtengo sanferminetan izan zen, eta berehala jakinarazi nuen hala Aralarren baitan nola NaBairen baitan. Ezker abertzaleko beste sektoreko batzuekin ere hitz egin nuen.

Zehazki zeri buruz hitz egin zenuten?

Batez ere bi gai jorratu genituen. Egoera politikoa eta espetxe politika. Elkarrizketa prozesuen porrotaren zergatiaz ere hitz egin genuen, baina zehazki espetxe politikaz mintzatu ginen. Mezu zehatz batekin joan ginen. Lehenik, sakabanaketa bidegabea da arrazoi ideologikoagatik. Bigarrenik, sakabanaketa ilegala da, eta teknikoki zigor gehitu bat Zigor Kodeari. Baina hirugarren argudio bat dugu, eta horretan ez gaude ados ezker abertzaleko beste sektorearekin. Presoen elkartzea balego, edo egon izan balitz, bilakaera ideologikoa askoz azkarrago egingo zen, eta eginen da. Argi eta garbi esan genion.

Zertan dago Gazte Abertzaleekin izandako ika-mika eta EAren azalpenak nahikoak iruditu al zaizkizu?

Pertsonalki ez dut ika-mika horretan parte hartu. Bigarrenik, ez dut deus eztabaidatzeko, eta ezin dut uneotan beste eztabaida bat ireki, baina jakin badakit asteartean, behintzat, Gazte Abertzaleek niri buruzko irainak oraindik zintzilik zituztela webgunean, eta niri ez didatela inolako azalpenik eman. Esan zutena iraingarria eta gezurra da. EAk bai. EA desmarkatu egin zen, eta pertsonalki deitu ninduten.

Udatik hona presoen argazkien aurkako kanpaina egin da, eta, azkenaldian, Etxerat-ek salatu du senideek oztopoak dituztela presoak bisitatzeko.

Bai. Argazkien afera horretan, ez dut esango lehendabizikoak izan ginela, baina bai lehendabizikoaren parekoak Aresen aurka atera ginenean. Bigarrena, zalantzarik gabe, giza duintasunaren eta eskubideen alde beti azaldu gara, eta orain ere egiten dugu.

Batasunak Altsasuko proposamena mahai gaineratu du. Zer diferentzia ikusten dituzu Anoetako proposamenarekin alderatuta?

Aldaketa batzuk azpimarragarriak dira. Batetik, Altsasuko adierazpenean Mitchell senatariaren printzipio ezagunak aipatzen dira, eta aintzat hartzen dira. Printzipio horiek ez dira inolaz ere neutralak, eta eduki garrantzitsua dute. Bigarrenik, bost atxilotuek atera zuten artikuluan alde bakarreko mugimenduen premia adierazten zen -guretzat oso garrantzitsua-. Hirugarrenik, Arnaldo Otegiri harrapatu dioten eskutitz horretan berriro Altsasuko agiriko printzipioen onespena egiten da. Urrats baikorrak dira. Baina badago Mugarri izeneko beste dokumentu hori, eta, aldiz, guri iruditzen zaigu bere edukia guztiz salagarria dela. Batetik, berriro ere markatzen du euskal politikarentzat eta zehazki ezker abertzalearentzat kaltegarria izan den egitura politiko militarraren eta abangoardiaren defentsa. Gu Mugarriren kontra zuzen-zuzen kokatzen gara. Salagarria, arriskutsua, kaltegarria eta, gainera, presoentzat ere kaltegarria da alde guztietatik. Hala ere, eztabaida horretan gauza berriak daude, eta ezin da hori mespretxatu, Alderdi Sozialistak eta neurri batean EAJren zuzendaritzak egin duten moduan.

Eztabaida ez da amaitu. Zer espero liteke?

Itxaropena izan behar da, baina zalantzarik gabe ez du esan nahi ez dugunik adi eta so egon beharrik. Horretan gaude. Adi eta so.

Beste alderdi abertzaleek zer-nolako ekarpena egin dezakezue?

Gure ekarpenak izan behar du zintzotasunez argi mintzatzea. Aralarren IV. kongresuko ildo politikoan ezker abertzale politikoaren ezaugarriak, baldintzak eta edukiak zehazten dira. Ez dugu beste hizkuntza politikoetan sartu nahi. Poloak eta beste deitura horiek guztiak ez dira gure hizkuntza. Guk ezker abertzale zibil eta politikoa egin nahi dugu.

Horren inguruan, nola ikusten duzu Espainiako Gobernuaren jokabidea?

Espainiako Gobernua ari da egiten bi gauza. Batetik, gutxiespena, eta hori ahoz egiten du. Eta, bestetik, bilakaera hori oztopatzen du. Ez da onargarria Auzitegi Nazionalaren jokabidea, behin eta berriro atxiloketak eginez. Horrek agerian uzten du herri honetan bakeaz gain, normalkuntza politikoa behar dugula. Hau da, ezabatzea legedi bereziak eta ezabatzea epaitegi eta auzibide bereziak.

Ezker abertzalearen barne eztabaida horrekin batera, indar subiranistak biltzeko proposamenak egin dira. Nola ikusten duzu?

Abertzaleok adostu behar ditugu jokabide batzuk: erabaki ahalmena defenditzea, herri honetako ondare ekonomikoak, politikoak, kulturalak, ingurumenekoak... defenditzea. Horrek ez du esan nahi indar politiko bateratu bat sortu behar denik. Lizarra-Garazik ez zuen sortu indar politiko bateraturik. Indartu zituen, hori bai, EAJ eta bestaldetik Euskal Herritarrok zena. Hori da etorriko dena, eta etorri behar duena.

Zer esan nahi duzu?

Abertzaleok jokatu behar dugu bat eginez, baina frentismorik gabe. Patxi Lopezek eta Antonio Basagoitik UPNk eta PSNk asmatu zutenaren kopia txar bat egin dute. Horren kontra ez dugu beste fronte bat ireki behar. Eraiki behar dugu ezker abertzale politiko bat. Ez dago inolako aukerarik abertzale guztiak elkartzeko indar politiko bakar batean. Abertzaletasuna ez da ideologia. Abertzalegoan gaude ezkerrekoak eta eskuinekoak, eta elkartu behar dugu batzen gaituzten gauzak defenditzeko, baina beste gauza batzuetan lehia politikoa egin behar dugu.

Hala ere, badirudi EA beste apustu batean dagoela. Indar abertzaleak bilgune batean egoteko apustu hori bateraezina da NaBairekin?

Nabairen proiektuak baditu arrazoi taktiko batzuk, eta horiek dira Nafarroaren egoera politikoaren erantzuna izatea. NaBairen baitan badaude ideia trasbertsal batzuk baita Nafarroako egoerari erantzuten diotenak ere. Nafarroa Bai ez da indar politiko baten egituraketa. NaBai da koalizio baten irudikapena. Horregatik uste dugu gauza bat dela Nafarroa Bai eta bestea ezker abertzale zibil eta zabala eraikitzea. Gu bi alde horietan gaude.

Baina bateragarriak dira?

Ez, ez dira bateragarriak.