Berria.info

2009-11-01

Euskal Herriaren independentziaren alde diren herritarren topalekua osatzeko lehen urratsak egin ditu Nazio Eztabaida Guneak. Horren sustatzeko, hainbat arlo, ikuspegi eta herritako lagunez osatuko den taldea eratzeko konpromisoa hartu du, baita independentisten arteko eztabaida indartzeko baliabideak martxan jartzekoa ere. Euskal herritar guztien eskubideak errespetatuko dituen esparru juridiko-politiko bat lortzeko, ezinbestekotzat jotzen du aldaketa. Modu demokratikoan izan beharko du, haren erranetan, eta euskal herritarrei beren etorkizunari buruz erabakitzeko eskubidea bermatu beharko dio.

Berrehun bat herritar bildu ziren atzo EHUko Donostiako campusean, sortu zenetik Nazio Eztabaida Guneak udazkenean egin ohi duen batzarrean. 38 eragile sozialek, sindikalek eta politikok parte hartu zuten, tartean pertsona ezagunak zeuden: Tasio Erkizia ezker abertzaleko kidea, Iñaki Aldekoa Aralarreko kidea, Ainhoa Etxaide LABeko idazkari nagusia, Antton Izagirre Tolosako alkate ohia eta Antton Laffont enpresaburua, besteak beste. Arlo sozial eta profesional askotako ordezkariak bertaratu ziren, baita lurralde guztietakoak ere.

Goiz osoan eztabaidan aritu ziren, batez ere gaur egungo egoerari buruz. Izagirre eta Ixabel Etxeberria Urruñako zinegotziek eman zuten eztabaidaren ondorioen berri. Parte-hartzaileek bat egin dute Euskal Herria aldaketa garaian dela. Euskal Herriaren nazio izaera eta bere erabakitzeko eskubidea gizartean errotuak direla uste duen heinean, Nazio Eztabaida Guneak herritarrei hitza emateko eskatu du, horrek egungo egoera gainditzen lagunduko duelakoan baitago.

Espainiako eta Frantziako estatuek Euskal Herriaren aurka daramaten «zapalkuntza» larriagotu dela uste du. Are kezkagarriagoa iruditzen zaio kontuan hartuz Europan bertan hainbat nazioren independentziarako aukerak eta aldarriak zabaltzen ari diren garaiotan. «Zergatik ez digute euskal herritarroi ere izan nahi duguna erabakitzen uzten?».

Hala eta guztiz ere, Etxeberriak eta Izagirrek zabaldutako mezua ez da guztiz ezkorra izan. Eta aurreko eztabaidan nabarmendu den bezala, independentziaren aldeko hainbat mezu eta ezaugarri baikorrak azpimarratu dituzte. «Zorionez, Euskal Herria ez da geldirik dagoen herria». Independentziaren aldeko oinarria oso sendoa eta anitza dela adierazi dute. «Euskal Herriak Europaren erdian estatu bat izateko dituen aukerak, baliabideak eta gaitasunak begi bistakoak dira ikusi nahi duenarentzat». Baina, horretarako, ezinbestekotzat jo dute independentziaren alde daudenek indarrak biltzea. Aldaketaren gorpuztea eta elikatzea abertzaleen eskutan dagoela argi dute, eta horretarako ilusioa badagoela nabarmendu dute. Euskal Herriak bere bitarteko kulturalak, linguistikoak, ekonomikoak eta instituzionalak izan ditzan, independentziaren aldeko aukerak gizartean indartu eta errotzeko deia egin dute. «Milaka eta milaka gara, eta gehiago izan nahi dugu. Indarrak gehitu».

Kriminalizazio garaiak dira honako hauek Nazio Eztabaida Gunearen arabera, baina horren aurrean, Izagirrek eta Etxeberriak argi utzi nahi izan dute herritarren gogoak agindu behar duela, eta ez dutela beste inork zer egin behar den errateko beharrik. «Horregatik, egin nahi dugun bide berria, zabala, parte-hartzailea eta guztion arteko adostasunez gauzatzea ezinbesteko premisa den neurrian, lana horrela egiteko konpromisoa hartzen dugu».

Konpromisoak

1. Egun sakabanaturik agertzen zaigun independentziaren aldeko oinarri sendoa aintzat hartuta, eztabaidatzeko, biltzeko eta adierazteko beste eskaintza bat egin nahi dugu.

2. Jendarteko sektore zabalen ilusioa, gogoa, aberastasuna eta aniztasuna metatuz, euskal herritarrok behar ditugun aldaketen protagonista aktiboak bihurtzeko konpromisoa hartzen dugu.

3. Euskal Herriak estatu gisa egituratzeko dituen aukerez eta gaitasunez aritu, eta independentziaren aldekotasuna hedatu eta indartzeko determinazioa publikoki adierazi nahi dugu.

Nazio Eztabaida Gunearen ibilbidea

2003

Nazio Eztabaidaren sorrera. Hainbat gogoeta eta egoeraren diagnosia egin ondoren, honako hiru oinarri hauek jarri zituzten: Euskal Herria aintzat hartzea, gatazka politikoa dagoela onartzea eta nazio gisa garatzeko oinarriak definitzea eta finkatzea. Horiekin bat egin zuten eragileek nazio eztabaidaguneari ekin zioten.

2004

Eztabaida. Nazio Eztabaida egin zuten urri amaieran. Urteak emandakoa eta aurrera begira egin beharreko lanak hitzartzen dituzte urtero egin ohi den osoko bilkuran. Euskal gizarteko esparru askotako pertsonak osatzen dute. 2004koan, Nazio Garapenerako Biltzarrak «euskal zikloa» egituratzea itundu zuen.

2005. Nazio Eztabaida egin zen Zarautzen. Nazio Plana onartu zuten.

2006. «Auzolan nazionala» antolatzea ebatzi zuten urrian Burlatan egin zuten eztabaidan, herritarren indarrak eta gogoak piztu eta egituratzea ekar zezakeela iritzita.

2007. Azaroan Barañainen egin zuten batzarrean ebatzi zuten aldaketaren alde indarrak biltzea egoera gainditzeko.

2008. Indarrak biltzea beharrezkoa zela ondorioztatu zuten Iruñean egindako batzarrean.