Berria.info

Bi manifestazio debekatu arren, ezker abertzaleak ez dio uko egin bere aldarrikapenak kaleratzeari. Martxa galarazteko prest zegoen ertzain andanari aurre egin, eta beraien aldarrikapenak aireratu dituzte, nahiz eta ez lortu manifestaziorik egiterik. Protesta debekatuta zegoen, eta asko izan dira debeku hori betetzeko Ertzaintzak egindako oldarraldiak. Bi lagun atxilotu dituzte, zaurituak ere izan dira, eta une batez Askatasunaren hiribideko trafikoa moztu dute manifestariek.

Eusko Jaurlaritzako Herrizaingo Sailaren eta Espainiako Auzitegi Nazionalaren debekua betetzeko prest zeuden ertzainez josita zegoen Bulebarra, 18:30ean. Festen hasierako kanoikada gertu zegoenez, jende ugari zegoen. Parte Zaharretik danbor jotzaileak atera ziren, kanoikadaren ekitaldira, eta haien atzetik manifestariak agertu ziren. Salbuespen egoera stop! Euskal Herriak autodeterminazioa leloa zuten afixak zituzten eskuetan, eta baita ikurrinak ere, xingola beltzekin. Denbora gutxian, gisa bereko kartel ugari agertu ziren han eta hemen, eta oihuka hasi ziren. «Independentzia!» eta «Demokrazia Euskal Herriarentzat!» leloak danbor hotsekin nahastu ziren.

Danbor jotzaileek aurrera egin ahala, aurrera egin zuten manifestariek ere, Ertzaintzak bidea itxi zien arte. Manifestariei oldartu zitzaien borra kolpeka eta ostikoka. Eta haiek Parte Zaharrean, Portu inguruan eta jende artean babestu ziren.

Ez ziren isildu, ordea, eta berriz ere pilatzen hasi ziren han eta hemen, eta kartelak bistaratu ziren berriz ere. Non-nahitik entzuten ziren oihuak, eta batek hasitakoak ingurukoen segida izaten zuen. «Demokrazia Euskal Herriarentzat!», «Utzi bakean, alde hemendik!» eta antzekoak nagusitu ziren.

Kartelak eta oihuak gailentzen zirenean oldartu egiten zer Ertzaintza, jendeari kartelak eskutik kenduz eta kolpeak emanez. Kanoikada bota zuten arte ez zuten pilotarik jaurti, gero bai. Ez zieten Bulebarretik ateratzen uzten manifestariei, eta horretan pasatu zuten ordubete inguruan bi gizonezko atxilotu zituzten. Parte Zahar barrura egin zuten korrikaldietako batean, handik atera zuten aurrenekoa, eta aurrez aurre zeukatela eraman zuten bigarrena. Sei-zazpi lagun pare-parean jarri zitzaizkien Ertzainei, kartelak eskuan zituztela. Indarka lurrera bota zuten bat, eta beste bat atxilotuta eraman zuten.

19:30 aldera, «Zaunk! Zaunk!» oihuen eta txistu artean furgonetetara joan ziren ertzainak -bidean botilakada bat ere jaso zuten-. «Remi, gogoan zaitugu!» eta «Zuek ere txakurrak zarete» oihukatu zieten. Bidea libre geratu zenean, manifestazio inprobisatu bat abiatu zen.

Hernani kalea zeharkatu eta Askatasunaren hiribidera iritsi zirenean, Ertzaintzaren lau furgoneta agertu ziren ziztu bizian, beraiek egindako bide beretik. Manifestari bat furgoneta baten aurrean jarri zen hari helduz, eta gero lasterka alde egin zuen. Kolpeka zein pilotakadaka hasi ziren ertzainak. Korrika ezkutatu ziren manifestariak. Artzain Onaren katedralaren eta Askatasunaren hiribidearen artean dauden oinezkoentzako kaleetan manifestazioarekin jarraitzen ahalegindu ziren, baina Ertzaintzak galarazi egin zien.

Geroago, Askatasunaren Hiribideko zirkulazioa itxita eduki zuten manifestari batzuek. Haien artetik pasatu zen auto bati kolpeak ere eman zizkioten. Bide ixtea bi aldiz eten zuen Ertzaintzak, eta azkenean, beren kabuz alde egin zuten manifestariek.

Bi tokitatik, bina debeku

Eusko Jaurlaritzako Herrizaingo Sailak ez ezik, Espainiako Auzitegi Nazionaleko Baltasar Garzon epaileak ere debekatu egin zituen ezker abertzaleak atzo arratsalderako deitutako bi manifestazioak. Hasieran 17:30erako antolatu zuten, Independentziaren bidean. Aldaketa politiko eta soziala lelopean. Baina, baimena eskatu zuen pertsonak «legez kanpoko taldeekin» harremana duela argudiatuz, debekatu egin zuten. Azken urteetako manifestazioetan istilurik izan ez zen arren, istiluak izan daitezkeela argudiatu zuen Rodolfo Aresen Sailak. Manifestazioaren deitzaileak bertan behera utzi zuen deialdia.

Debekuaren ostean, beste manifestazio bat antolatu zuen ezker abertzaleak. Ordubete geroago ateratzekoa zen Bulebarretik, Salbuespen egoera stop! Euskal Herriak du hitza eta erabakia lelopean. Baina hura ere debekatu egin zuen Herrizaingo Sailak, eta protesta egin ez zedin bere esku dauden bitarteko guztiak erabiliko zituela ohartarazi zuen.

Dagoeneko bi manifestazioak debekatuta zeudenean iritsi zen Garzonen debekua.