Berria.info

2009-07-18

Arabako Lurralde Auzitegiko epaileak hamalau hilabeteko kartzela zigorra eta isun ekonomikoa ezarri dio Aitor Fernandez de Ortegari. Beste bi auzipetuak, Andoni Txasko eta Josu Ormaetxea, absolbitu egin ditu.

2006ko martxoaren 3an Gasteizen egin zen manifestazioaren osteko liskarretan atxilotu zuten Fernandez de Ortega. «Desordena publikoa, ertzainak zauritu eta iraintzea eta erresistentzia» delituengatik zigortu dute.

Bestalde, manifestazioan kartzelan hil berri ziren etakideen argazkiak eramateagatik Andoni Txasko eta Josu Ormaetxea atxilotu zituzten. Ertzainek ezin izan dute frogatu manifestazioan presoen argazkiak kentzeko agindurik eman zutenik. Hori dela eta, ertzainek «babes legal» gabe jardun zutela erabaki du epaileak, Txasko eta Ormaetxea zigor gabe utziz. Bi lagun horiei «ertzainei eraso egitea, zauriak eragitea eta polizien aginduei men ez egitea» leporatu zien Fiskaltzak. «Terrorismoa gorestea» ere egotzi zieten, baina Auzitegi Nazionalak 2007an salaketa artxibatu zuen.