Berria.info

2009-06-28

Urtebetean Txinako berriemaile gisa euskaraz egindako lanaren saria jaso du Olatz Simon EITBko kazetariak: Rikardo Arregi kazetaritza sari nagusia. Txinako gizartearen berri «zorrotz eta ulerterraz» eman duela iritzi dio epaimahaiak. «Topikoetatik haratago, Txinako gizartera hurbiltzeko modu aberatsa eskaintzen die ikus-entzuleei».

Simonek hunkituta hartu du saria, eta esan du «ohore bikoitza» dela. Euskaldun berria da, eta bereziki poztu du euskaraz egindako lanagatik saria jasotzeak. «Euskara ez da nire ama hizkuntza. Etxean inork ez zekien euskaraz». Horregatik, eskerrak eman dizkie euskara kontuetan lagundu dioten guztiei. «Nire hankasartzeak konpondu dituzte, eta haiekin batera ikasi dut euskarazko kazetari izaten».

Kazetari Berria saria Argia aldizkariko kazetari Gorka Bereziartuak jaso du. Kazetariaren «sena, kritikotasuna eta ausardia» txalotu ditu epaimahaiak. Euskal kulturari kritika egitea «arrisku handiko kirola» dela esanez hartu du saria Bereziartuak. «Sariak urte osoan barruan eraman dudan arantza bat atera dit».

Euskadi Irratiko Kostaldeko trena saioko taldeari eman diote Sari Berezia, kantuei buruzko azalpenak eta istorioak biltzeko egindako lanagatik. Iñigo Martinek hartu du oroigarria.

Sariez aparte, Ohorezko Aipamena Ttipi-Ttapa taldeari eman diote. Urtarrilean eten egin behar izan zituzten Ttipi-Ttapa telebistaren emankizunak, diru arazoengatik. Joxe Manuel Irigoien zuzendariak eta Pello Apezetxea sortzaileak jaso dute. «Saria jasotzea zinez eskertzekoa da, eta lagunduko digu aurrera segitzen».

Rikardo Arregi kazetaritza sariak atzo eguerdian banatu zituzten, Andoainen (Gipuzkoa), Arregi zenaren herrian. Han izan ziren, besteren artean, Eusko Jaurlaritzako Kultura sailburu Blanca Urgell, eta Hizkuntza Politikarako sailburuorde Ramon Etxezarreta. Urgellen esanetan, euskal kazetaritza «kalitate onekoa» da. «Lehengo gogo eta borondateari prestakuntza profesional bikaina gaineratu zaio». Euskarazko kazetaritzan dihardutenen lana goraipatu du. «Euskal herritar guztiek, bereziki ingurune erdaldunetan bizi diren haiek, aukera dute egunero kalitatezko euskaraz gozatzeko».