Berria.info

Auzitegi Gorenak jakinarazi du 18/98 auziaren epaia, auzipetuen defentsak jarritako helegiteei buruzko auzi saioa egin hilabete luze beranduago. 1.097 orrialde ditu atzo kaleratutako epaiak. 38 lagun zigortu ditu eta 9 absolbitu. Guztira, 291 urteko espetxe zigorrak ezarri ditu. Auzitegi Nazionalak ezarritako kopurua (525 urte) nabarmen murriztu du Auzitegi Gorenaren epaiak. Auzitegi Nazionaleko fiskalak eskatutako kopuruarekin (439 urte) alderatuta ere, zigor kopuru txikiagoa jarri du. Halaber, Auzitegi Goreneko fiskalak eskatutako kopurua ere (402 urte) murriztu du epaimahaiak.

Auzitegi Gorenak, funtsean, bere egin ditu akusazioen tesi nagusiak. Era berean, KAS, Ekin eta Xaki legez kanpoko jotzea eta desegitea ontzat jo du. Baina Orain SA, Ardatza SA, Hernani Inprimategia, Lema 2000, Erigane SL, Uralde SL, Untzorri Bidaiak Ganeko, Ugao SL eta Gadusmar SL enpresen kasuan baliogabetu egin du legez kanpokotzat jo izana.

Oro har, auzipetu gehienei egotzitako ETArekiko lotura ontzat jo du Auzitegi Gorenak, baina lotura horren gradua ezartzean datza aldaketa nagusia. Akusatu batzuei ETAko kide zuzendari mailan izateko akusazioa zuritu die eta beste batzuei kide izatearen delituaren ordez laguntza ematearena ezarri die. Horrekin batera, delitu bakoitzari zigorra zehazteko orduan gehienezko kopurua aukeratu beharrean (Auzitegi Nazionalak egin zuen bezala), gutxieneko kopuruaren alde egin du kasu askotan.

Ondorioz, Auzitegi Nazionalak ezarritako zigorrik handiena 24 urtekoa izan bazen ere (Jose Luis Elkorori), Auzitegi Gorenak ezarritako handiena 12 urte eta bederatzi hilabetekoa izan da (Xabier Alegriari). Zigor txikiena ere txikiagoa da orain. Xabi Oterori eta Iñaki Zapiaini urte bat eta hamar hilabeteko zigorra ezarri die Auzitegi Gorenak, ondasunen altxamenduaren delitu bategatik.

Absoluzioei dagokienez, Auzitegi Goreneko fiskalak sei lagunentzat eskatu bazuen ere, Auzitegi Gorenak bederatzirentzat eman du: Joxemi Zumalabe Fundazioaren ataleko Mikel Aznar, Iñaki O' Shea, Sabino Ormazabal, Mikel Zuluaga, Olatz Altuna, Fernando Olalde, Alberto Frias, eta Mario Zubiagarentzat, eta Ekin ataleko Natale Landarentzat. Hortaz, Gorenak berak apirilaren 29an iragarri zituen absoluzioak berretsi egin ditu epaian.

Zigorren multzoak

Zigorrak banan banan zehazteko orduan talde batzuk egin ditu, «ardura maila» ezberdinen arabera. Auzitegi Gorenaren ustez, akusatu batzuk «zuzendari» gisa aritu dira. Multzo horretan sartu ditu Xabier Alegria (12 urte eta 9 hilabete), Txema Matanzas (10 urte eta 9 hilabete), Ruben Nieto (10 urte eta 9 hilabete), Joxean Etxeberria (12 urte) eta Mikel Egibar (9 urte eta 6 hilabete).

Beste batzuen kasuan, Auzitegi Nazionaleko epaiak «zuzendari mailan» zigortu bazituen ere, Gorenak ETAko kide gisa utzi du haien esku-hartzea: Bigarren Ibarra (13 urtetik 8 urte eta 6 hilabetera gutxitu dio zigorra), Bixente Askasibar (13 urtetik 8 urte eta erdira), Elena Beloki (13 urtetik 8 urte eta erdira), Joxe Mari Olarra (13 urtetik 8 urte eta erdira), Juan Mari Mendizabal (13 urtetik 8 urte eta erdira) eta Carlos Trenor (17 urtetik 10 eta erdira).

Beste auzipetu talde handi baten kasuan ETAko kide izateko akusazioari eutsi dio Gorenak, bakoitzari 7 urte eta erdiko zigorra ezarrita: Iker Beristain, Joxe Garcia Mijangos, Xabier Salutregi, Mikel Korta, Xabier Arregi, Xabier Balanzategi, Iker Casanova, Imanol Iparragirre, Olatz Egiguren, Ana Lizarralde, eta Paul Asensio.

Beste talde bati, erakunde armatuko kide izateko akusazioa laguntza ematekoagatik aldatu dio epaimahaiak: Patxi Gundin, Joxean Diaz, Juan Pablo Dieguez, Inma Berriozabal, Miriam Campos, eta Nekane Txapartegi.

Teresa Toda, Jose Luis Elkoro, Jesus Mari Zalakain, Isidro eta Patxi Murga, Pablo Gorostiaga eta Manu Intxausperen kasuan, laguntza eman izanaren delitua mantendu die, baina Auzitegi Nazionalak ezarritako zigorra baino leunagoa jarri die, batez ere, delitu ekonomikoak ere dituztenen kasuan (horiei dagozkien kopurua ezartzeko beste irizpide bat erabili duelako).

KAS, Ekin eta Xaki

Zigor pertsonalez gain, hiru elkarte legez kanpoko izendatu ditu Gorenak: Koordinadora Abertzale Sozialista (KAS), Ekin eta Xaki. Horiek guztiak ETAren zatitzat jo ditu. Hortaz, legez kanpokoak direla esan, eta horiek desegiteko agindu du, aurrez Auzitegi Nazionalak egin zuen bezala.

Gorenaren esanetan, epaimahaiak ez du arazorik izan agindu hori berresteko. Auzitegi Nazionalaren argudioak argiak zirela esan du, eta bere egin du elkarte horien lana eta helburua erakunde armatuaren zereginaren barruan kokatzen duen tesia. Gorenaren esanetan, hiru elkarte horiek ez ziren ETAri laguntza ematera mugatzen. Erakunde armatua bera osatzen zuten. Hortaz, zuzenean agindu du legez kanpo jo eta desegiteko.

Auzitegi Nazionalak desegiteko agindua emana zuen gainerako elkarteekin, ordea, ez da gauza bera gertatu. Auzitegi Nazionalak esan zuenez, Orain eta enpresen atalean barnebildutako elkarteek ETAri laguntza ematen zieten eta erakunde armatuaren helburuak erdiesteko bidean lan egiten zuten. KAS koordinadorak zuen ETA eta enpresen arteko zubi-lana egiteko ardura nagusia lehenik, eta Ekinek ordezkatu zuen ondoren KAS lan horretan. Beraz, bi elkarte horietako kideak ETAko kide ziren, eta gainerako elkarteei erakunde armatuaren aginduak ematen zizkien. Xaki, berriz, ETAk nazioarterako zuen «enbaxada» zela zioen.

Gainontzeko enpresak desegiteko argudiorik, berriz, ez dagoela esan du Gorenak. Elkarteak ETAren barruan kokatu gabe ezin zaiela neurri hori ezarri.