Berria.info

Euskal Herriaren Alde zerrendak Euskal Herriak Europan behar duen tokia aldarrikatu zuen atzo goizean, Lapurdi eta Gipuzkoa lotzen dituen Pausuko zubiaren bazter batean. Europako mapa batean Euskal Herria eta Lituania kokatu zituen, «Euskal Herria eremu gisa aldarrikatzeko». Lituaniak eta Euskal Herriak biztanle kopuru bertsua dutela-eta, Lituaniaren gisan, Euskal Herriak ere hamabi diputatuko ordezkaritza behar duela erran zuen Ixabel Etxeberria EHAko zerrendaburuak.

«Herri guztiek badute ordezkari kopuru bat. Europak estatu batzuk ezagutzen ditu, baina ez ditu herri txikiak ezagutzen. Guk herrien Europa aldarrikatzen dugu». Hauteskunde kanpaina labur honetan, «ezker abertzaleak oinarrizko mezuak» eman nahi dizkie herritarrei, Ixabel Etxeberriaren arabera. Euskal Herriaren helburua «besteek Europan dituzten eskubide berak lortzea» da, mezu hori. «Lurraldetasuna biziki inportanta da». Gaur egun hiru erakundetan banatua izatea deitoratu zuen.

Jon Anzaren egoera

Bestalde, Jon Anzaren desagertzeak hauteskunde kanpainan «ikaragarriko pisua hartu» duela adierazi zuen Etxeberriak. «Abantzu bakarrak gara hori aipatzen dugunak. Hemengo agintariek ez dute deus erran». Beste desagertze kasuetan, «urgentziazko neurriak berehala hartzen» dituztela baina Anzarekin ez dela holakorik gertatu nabarmendu du. «Ezin da onartu erreakziorik ez izatea. Demokrazia batean onartezina da desagertze politiko bat», erran du EHAko zerrendaburuak.