Berria.info

AHTaren Lemoa eta Galdako (Bizkaia) zatiko lanak direla-eta Espainiako Gobernuak egin nahi dituen «nahitaezko» desjabetzeen aurkako helegiteak aurkeztu zituen atzo, AHT Gelditu! Elkarlanak, eta elkarretaratzea egin zuten Espainiako Gobernuak Bilbon duen ordezkaritzaren egoitzaren aurrean. «Desjabetze horietan ez da kontuan hartzen ondasun publikoen gainean denok dugula eskubidea, eta hori salatu nahi dugu». Gainera, proiektua eskatu diote Espainiako Sustapen Ministerioari, eta herritarren artean eztabaida zabaltzeko. «Parte hartzeko eta kontsultarako sistemen erabateko birplanteamendua eskatzen dugu, herritarrek halako proiektuen inguruko erabakietan eragina eta zeresana izan dezaten». Helegiteak jartzeko epea luzatzeko ere eskatu dute. «15 egun gutxi dira kaltetuek beren eskubideak egikaritzeko».

Bestalde, herenegun, AHTaren aurkako grebalari batzuek Zaratamo eta Basauriko San Migel (Bizkaia) arteko obrak gelditu zituzten, eta AHTak eragiten dituen «kalteak» salatu zituzten.