Berria.info

Nafarroan abiadura handiko trenak, AHTak, badu egitura handi guztiek behar duten babes politikoa ziurtatuta. Miguel Sanz Nafarroako presidenteak eta Jose Blanco Espainiako Sustapen ministroak, behintzat, horixe irudikatu nahi izan zuten atzo Iruñean, tren lasterra hiribururaino eramango duen protokoloa sinatzeko ekitaldi instituzionalean. «Zalantza guztiak amaitu dira» nabarmendu zuen Blancok. «Orain, ziur gaude. Asko kosta izan da, eta bilera asko egin behar izan ditugu hona iristeko. Horregatik esan dezakegu eman dugun pausoa historikoa dela».

Sanzek bereziki Blancoren lana eskertu zuen, «berak desblokeatu duelako oso trabatuta zegoen akordioa», eta berak ere historiko hitza erabili zuen akordioa hitz bakar batean definitzeko. Eta, gero, beste tanta bat gehitu zion, akordioa bera «indar demokratiko nagusien artean lortutako hitzarmen instituzionala» zela nabarmendu zuelarik. «Inork ez du geldiaraziko lan hau», azpimarratu zuen presidenteak. «Are gutxiago xantaia erabiltzen dutenek».

Alderdietako ordezkari ugari

sinatzea ekitaldia protokolozko ekitaldi handienetarako erabiltzen den Tronuaren Gelan izan zen, Nafarroako Jauregian. Nafarroako gobernukide guztiak han ziren, eta UPN, PSN, PP eta CDNko ordezkari ugari. Baita Espainiako Gobernu ordezkaria eta hainbat udalerritako ordezkariak ere.

Hitzarmenak AHTa Iruñeraino eramateko baldintzak aurreikusten ditu, eta finantzatzeko moduak zehazten, baina deigarria da bi korapilo askatu gabe uzten dituela. Tuterako geltokiarena, alde batetik; Euskal Y-arekiko lotura, bestetik. Blancok eta Sanzek ez zuten horiei buruz daturik eman nahi izan, baina biek onartu zuten gaiak mahai gainean daudela eta goiz ala berandu erabakiren bat hartu beharko dutela. Atzokoa, ordea, akordioaren balio politikoa azpimarratzeko ekitaldia izan zen.

Sustapen ministroak ez zuen ezkutatu hartu-eman asko behar izan direla azkenean hitzarmena sinatzeko, eta elkarrizketaren aldarria egin zuen horregatik. «Gobernatzeko, hitzartu beharra dago, adostu. Konfrontazioarekin ez dago aurrera egiterik». Sanzek, hain zuzen ere, aurreko ministroen jarrera itsustu zuen haien izenak aipatu gabe, sinatzea Blancoren meritua zela errepikatu baitzuen. «Hilabete eta erdi baino ez du behar izan urteetan geldirik egon dena abiatzeko».

Bi agintariek akordio honen garapena ere asko azpimarratu zuten atzoko agerraldian. Eta etorkizunera begira Mediterraneo eta Kantauri itsasoak Iruñean barna tren lasterraz lotzeko proiektua dagoela nabarmendu zuten. Alegia, Euskal Y-arekin lotzeko proiektua egon bai, baina oraindik ezer zehaztuta ez dagoela.

«Tren eraginkorra eta garbia»

Trena «eraginkorra eta garbia» izango dela azaldu zuen ministroak. CO2 isurkinak murriztuko dituela, «ingurumenarentzat hobekuntza handiak» ekarriko dituela eta «segurua eta erosoa» izango dela. Oposizioa nahastuta dagoela, alegia. «Gutxiengo bat tematuta dago kontrako jarrera zentzugabearekin, baina gehienontzat esanahi handikoa da proiektu hau», esan zuen. «Nafarroa bi itsasoetara hurbilduko du, eta Iruñeko paisaiarendako ere aurrerapauso handia izango da».

Sanzek, bestetik, finantzaketa seinalatu zuen. Hitzarmen ekonomikoa baliagarria zela ordainketa egiteko, eta AHTaren bidez, gainera, «Nafarroako bakartze historikoa» bukatuko zela esan, esan zuen. «Nafarroa Madrildik bakartuta egon da, batzuetan gure erruagatik, eragina saihesteko. Frantziatik ere bai. Baina esan behar da besteek ere ez dutela interesa erakutsi bakartze horiek amaitzeko. Hori gogoratu behar da, orain poztu ahal izateko. Orain, abiatuko gara», gaineratu zuen.