Berria.info

Euskadunon Egunkaria-ri lotutako auzi ekonomikoaren epaiketa edozein momentutan egin zitekeen, baina auzi horretako eginbide gehienak baliogabe jo ditu Espainiako Auzitegi Nazionaleko 2. Zigor Salak. 2007ko apirilaren 10etik aurrera hartutako erabaki guztiak bertan behera utzi ditu, eta auzia prozedura laburtu bihurtu aurreko unera eraman du berriz ere. Hala, ordutik hona egin diren eginbideak errepikatzeko agindu du. Ia hasieratik hartu beharko dute auzia, berriz ere, eta une honetan ez dago inoren kontrako zigor eskaerarik.

Kontua da, Auzitegiko Salak arrazoia eman diola defentsari, Joan Mari Torrealdairen, Txema Auzmendiren eta Iñaki Uriaren defentsa eskubidea ez dela errespetatu esaterako orduan. Hiru horiek Egunkaria-ko auzi nagusian atxilotu eta auzipetu zituen Auzitegi Nazionaleko Juan del Olmo epaileak. Bigarren auzian ere inputatu egin zituen, baina ez zien deklaraziorik hartu. Pertsonari entzutea ezinbesteko baldintza da, ordea, norbait inputatzeko. Instrukzioa ez du ondo egin Del Olmo epaileak, eta halaxe adierazi du Auzitegiko Salak.

Defentsak helegitea jarri zuen hiru lagun horiei defentsarako eskubidea urratu zaiela argudiatuz, eta Auzitegiak arrazoi eman dio, prozedura akatsak egin direla onartuz. Salak ez du garbi-garbi esaten defentsa eskubidea urratu zaienik, baina «babesgabetasun egoeraren bat egotea ezin denez erabat baztertu», zalantzak egon daitezkeela onartu du. Horregatik, «prozedura erabat garbia» izan dadin, eginbide horiek baliogabetzat jo ditu, bost orrialdetako autoan.

Berriz egin beharko dituzte ia urrats guztiak. Litekeena da eginbide horiek berdin-berdin errepikatzea akatsak zuzenduta; edo litekeena da prozeduran erabaki desberdinak hartzea, auzia beste norabide batera bideratuz. Nolanahi ere, zaila izango da bigarren aukera hori betetzea, Auzitegiak ez baititu zalantzan jarri auziaren oinarriak. Esate baterako, ez dute berriz egingo Espainiako Ogasunak delitu ekonomikoak ikusten dituela esanez egin zuen txostena, eta txosten hori da auziaren oinarrietako bat.

Beraz, pentsa daiteke Torrealdai, Auzmendi eta Uria deklaratzera deituko dituztela, eta hortik aurrera, orain arteko norabide berean errepikatuko dituztela aurretik egindako urratsak.

Zortzi inputatu

Egunkaria-ko auzi ekonomikoan zortzi lagun zeuden inputatuta: Joan Mari Torrealdai, Iñaki Uria, Txema Auzmendi, Joxe Mari Sors, Ainhoa Albisu, Mikel Sorozabal, Begoña Zubelzu eta Fernando Furundarena. Torrealdai, Uria eta Auzmendi inputaziorik gabe geratu dira orain, baina egoera ez zaie aldatu gainerakoei.

2003ko urriaren 17an -Egunkaria itxi eta zortzi hilabete geroago- Mikel Arrizabalaga, Angel Diez, Armando Hernandez, Mikel Sorozabal, Joxe Mari Sors, Mikel Azkune, Joanmari Larrarte eta Xabier Legarra atxilotu zituzten ekonomia delituak egin zitzaketela pentsatuta. Gerora Zubeltzu, Furundarena eta Albisu deitu zituen deklaratzera.

Bere garaian, defentsaren eskaerarekin bat egin eta auzia Donostiako auzitegira edo Tolosakora eramatearen alde agertu zen Fiskaltza, auzia ez zela Espainiako Auzitegi Nazionalaren eskumena argudiatuta. Baina eskaera ez zuen aintzat hartu Auzitegiak, eta akusazioa egiteko agindu zion Fiskaltzari. Herri akusazioarekin bat egin zuen orduan Fiskaltzak, eta Dignidad y Justiciak egindako eskaera bere egin zuen, zortzi lagunentzako 184 urteko espetxe zigorra eskatuz. Orain, ordea, errepikatu egin behar da akusazioak osatzeko urratsa ere.

Egunkaria-ko auzi nagusiaren jarraipena da auzi ekonomiko hau. Auzi nagusiari eusteko ez dago habe indartsurik. Fiskaltzak ez du inolako deliturik ikusten, eta auzia artxibatzeko eskatu zuen. Epaileak aurrera egitea erabaki zuen, baina herri akusazioarekin bakarrik. Baldintza horietan auzi bat ezin dela aurrera eraman argudiatu du defentsak. Ikuskizun dago auzi horrekin zer gertatuko den, eta horrek ere eragina izan dezake bere ondorioa den bigarren auzi honetan.