Berria.info

Joan den asteartean Hernanin eta Urnietan atzemandako gazteak frogarik gabe atxilotu eta espetxeratu zituztela salatu zuten atzo, Donostian, senide eta abokatuek. Iñigo Alzelai gazteak Espainiako Poliziaren eskuetan igarotako egunetan tratu txarrak jasan zituela adierazi, eta egun horietan bizitakoa kontatu zuen. Atxilotutako zortzi gazteetatik aske geratu den bakarra da Alzelai, hamar mila euroko bermea ordaindu ondoren. Gainontzeko zazpiak espetxeratu egin zituzten, iragan larunbatean. Ainhoa Baglieto abokatuak eta Amnistiaren Aldeko Mugimenduak azken atxiloketa eta espetxeratzeak gogor salatu eta inkomunikazioa bertan behera uzteko eskatu dute.

«Rubalcaba ministroak argitu zuen atxiloketa hauek prebentiboak zirela. Inolako lotsarik gabe azaldu zuen horien izaera. Esan behar dut zuzenbide penalean eta konstituzionalean, ez dela posible halako atxiloketak egotea», adierazi zuen Baglietok. Azken atxiloketen xedea oso argi dagoela gaineratu zuen abokatuak. «Euren helburua ez da delitua egin duten gazteak atxilotzea. Ezta ere etorkizunean gazte horiek egin dezaketen delitu bat saihestea. Jarrai-Haika-Segi prozedurarekin hasi zuten helburua betetzera doaz. Euskal Herriaren alde egiten duten gazteak atxilotu eta espetxeratzea dute helburu».

Nekane Erauskin Aitzol Arrieta Hernanin atxilotutako gaztearen amak ere hitz egin zuen. Erauskinek salatu zuen, gazteak atxilotu eta inkomunikatu ondoren froga bila ibili direla. Horretarako adibide bat eman zuen: «Osaba bat dut Ordizian lur eremu bat duena. Bertan AHTaren obrak egiten ari dira. Kontua da aurreko asteazkenean Ertzaintza nire osabarengana joan zela nire semearen inguruan galdezka. Obrak hasi zituztenetik semea ez da bertan izan osabari laguntzen, baina egon izan balitz zer leporatuko zioten?». Erauskinek Ertzaintzaren jarrera salatu zuen. «Oraindik Ibarretxe da horien arduraduna. Gure gazteak espetxean sartzeko kolaboratu dute».

Atxiloketaren unean berri agentziek zabaldutako informazioaren arabera, «kale erasoekin zerikusia izatea» egotzi zien zortzi atxilotuei Baltasar Garzon Auzitegi Nazionaleko epaileak. Baita Segi gazte erakundeko kide izatea ere. Akusazio horien aurrean, Baglietok nabarmendu zuen «legeak nahi bezala interpretatu eta egokitzen» dituztela, eta horretarako, aitzakiak bilatzen dituztela. «Kale borrokan aritzearen aitzakia erabili dute, baita kale borroka saihesteko aitzakia ere».

Frogarik ez egotea salatzearekin batera, atxilotutako gazteek polizia-etxeetan jasotako tratua salatu zuen Baglietok. «Bost egunez inkomunikatuta izan dituzte. Horrela eduki al zituzten Gurtel auziko atxilotuak? Edo Lazkaoko taberna txikitu zuen pertsona inkomunikatu al zuten?». Horrekin batera, abokatuak adierazi zuen inkomunikazioaren unerik gogorrena Donostian pairatu zutela atxilotuek.

Protokoloa ez da betetzen

Auzitegi Nazionalak tratu txarren kontra ezartzen duen protokoloa «torturak apaintzeko neurri sorta antzua» dela esan zuen atzo AAMk. «Torturak benetan saihestu nahi badituzte, ezabatu dezatela inkomunikazioa eta horrela soilik bermatuko da atxilotuak ez torturatzea». Horrekin batera, salatu zuten Euskal Herrian «lan politikoa eta soziala» espetxearekin eta sakabanaketarekin «ordaintzen» dela. «Gazte independentista izatea delitu bilakatu dute».

Datua