Berria.info

48 urteko gizonezko batek emaztea hil eta alabetako bat larri zauritu zuen herenegun gauean, Gernika-Lumon (Bizkaia). Genero indarkeriaren ondorioz aurten Euskal Herrian zendutako lehenengo emakumea da Izaskun Jimenez Borja; 44 urte zituen, eta bost seme-alaba. Ertzaintzak haren senarra atxilotu, eta epaileak espetxera bidaltzea ebatzi zuen atzo arratsaldean. Egindako hilketa aitortu zuen J.F.J.J-k.

Astelehenean, 23:15 aldera gertatu zen erasoa, Gernikako Barrenkale kalean familiak zuen etxebizitzan (herriaren erdigunean). Eusko Jaurlaritzako Herrizaingo Sailak jakitera eman duenez, eztabaida baten erdian, gizonak labana bat hartu, eta Izaskun Jimenez eta bere 19 urteko alaba zauritu zituen. Bikotearen 11 urteko semearen aurrean gertatu zen erasoa; bizilagun bati laguntza eskatu zion adingabeak, eta hark Ertzaintzara deitu zuen.

Osasun zerbitzuak Izaskun Jimenez biziberritzen saiatu ziren, baina bertan zendu zen; Bilboko Auzitegiko Patologia Zerbitzura eraman zuten haren gorpua. Zauritutako alaba, aldiz, Galdakaoko Ospitalera eraman zuten, eta handik Gurutzetako Ospitalera mugitu zuten. Bularrean, iztarrean eta besoetan dauzka zauriak emakume gazteak; Gurutzetako prentsa zerbitzuak adierazi duenez, emakumea suspertzeko unitatean dago, oso larri.

Ertzaintzak kalean atxilotu zuen ustezko hiltzailea, biktimen etxetik hurbil, taberna batean tabakoa erostetik atera ondoren. Erasoak egitean erabilitako labana zuen eskuan. Gernikako 3 zenbakiko Instrukzio Epaitegira eraman zuten, eta bertan, emaztea hil eta alaba zauritu izana aitortu zuen J.F.J.J-k. Behin-behinean espetxeratzeko agindu zuen epaileak, eta Basauriko (Bizkaia) kartzelako psikiatriako unitatera eraman zuten; izan ere, erasotzailearen azterketa medikoa eskatu du epaileak. Berri agentziek jakitera eman dutenez, emaztea hiltzea eta alaba hiltzen saiatzea leporatu diote.

Seme-alabengatik kezkatuta

Jatorriz Tolosakoa (Gipuzkoa) zen Izaskun Jimenez Borja, eta San Adriangoa (Nafarroa) bere hiltzailea. Azken urteetan, ordea, Busturialdea eskualdean bizi izan da familia, eta 2007tik Gernika-Lumon. Ertzaintzak adierazi duenez, atxilotuak ez zuen aurretik tratu txarren inguruko salaketarik izan, eta ez du aurrekari penalik.

Bikoteak bost seme-alaba zituen, eta euretako hiru gurasoen etxean bizi ziren. Hain zuzen, horien gaineko kezka agertu dute Gernikako Udalak eta zenbait eragilek. Erasoen lekukoa izandako 11 urteko haurra anai-arreba nagusien etxean dagoela jakinarazi du Udaleko Berdintasunerako zerbitzuen arduradun Begoña Landak. Adingabea nola babes daitekeen aztertzeko, zerbitzu juridikoekiko harremanetan jarriko direla gaineratu du Landak, eta «behar duten laguntza guztia» emateko prest agertu da. Gernikako alkate Jose Maria Gorroñok ere adierazi du Udalak «ahal duen guztia» egingo duela seme-alabei laguntzeko.

Ildo beretik mintzatu da Clara Campoamor elkarteko presidente Blanca Estrella Ruiz. Zauritutako alabari laguntza emateak izan behar du orain lehentasuna, bere hitzetan: «Lur jota egon behar du, ama hiltzeaz gain, bera ere hiltzen saiatu delako aita». Hortik aurrera, genero indarkeriaren aurka jarduten jarraitu beharra nabarmendu du: «Biktimekin zer egin aztertu behar dugu, berriro larrienera, hilketara, hel ez daitezen». Genero indarkeria kasu guztietan egiten dutenez, Izaskun Jimenezen hilketaren auzian ere herri akusazio gisa aurkeztuko dela iragarri du Clara Campoamor elkarteak.

Elkarretaratzeak

Aurten, Euskal Herrian genero indarkeriaren ondorioz hildako lehen emakumea da Izaskun Jimenez. 2008an, sei andre hil ziren gizonen erasoen ondorioz, eta Lizarrako (Nafarroa) Maria Puy Perez Ezpeletak desagertuta jarraitzen du iazko urritik; haren bikotekide ohia atxilotu zuten, baina aste batzuen ondoren aske utzi zuten.

Emakumeen Mundu Martxarako Plataformak hainbat elkarretaratze deitu ditu Izaskun Jimenezen hilketa gaitzesteko. Bestalde, hilketak gaitsezpen erreakzio ugari eragin zituen erakunde, alderdi eta sindikatu ezberdinetan. Besteak beste, Ezker Batuak eta Bizkaiko Eusko Alkartasunak salatu zuten Jimenezen hilketa.

Eusko Legebiltzarra