Berria.info

Udaletako euskara zerbitzuen arduradun eta ordezkariak bilduko dira datorren maiatzaren 7 eta 8an Lasarte Orian (Gipuzkoa). Han egingo dituzte, estreinakoz, Udaltop topaketak. Lehen aldi honetan, euskararen familia giroko transmisioa aztertuko dute. Patxi Baztarrika Eusko Jaurlaritzako Hizkuntza Politikako sailburuordeak, transmisioaren garrantzia nabarmendu zuen atzo, jardunaldien aurkezpenean. «Familian transmititzen ez den hizkuntza, edo gero eta gutxiago transmititzen dena, marjinaziora ez ezik, desagerpenera ere kondenaturiko hizkuntza da». Hala, giltzarria guraso berrien borondatea izango dela adierazi du Baztarrikak.

Manuel Lekuona kultur etxean egingo dira topaketak, eta 120 lagunek parte hartu ahal izango dute. Martxoan zabalduko da izena emateko epea, www.udaltop.net webgunean. «Berez, udal zerbitzuetako teknikari eta ordezkariengan pentsatuta daude topaketa hauek, baina euskararen edo eta bestelako hizkuntza gutxituen inguruan lanean ari direnek ere eman dezakete izena», azaldu du Maria Jesus Aranburuk, Gipuzkoako Foru Aldundiko Kultura diputatuak. Aranburuk, Foru Aldundiak euskararen normalizaziorako bidean hartutako konpromisoekin lotu du Udaltop antolatzea: «Datozen urteetan ere topaketak antolatzea da gure asmoa eta, orain bezala, Lasarte-Orian izatea».

Parte-hartzaileek aldez aurretik jasoko dituzte topaketetan aurkeztuko diren txostenak. «Topaketak hausnarketarako gune izatea nahi dugu, ez informazio trukaketa hutsa. Jendeak bere galderak eta proposamenak egitea nahiko genuke, eta gaiaren inguruan eztabaida izatea», nabarmendu du Ricardo Ortegak, Lasarte-Oriako zinegotziak.