Berria.info

Espainiako Senatuko talde politiko guztiek eskatu diote Gobernuari «lehenbailehen» hasteko AHTren obrak Nafarroan. Mozioak Gobernuari eskatzen dio, bi hilabete baino lehen, apirilerako, Nafarroako Gobernuarekin akordioa ixteko. PPko senatari Jose Ignacio Palaciosen mozioa eztabaidatu behar zuten, atzo, Senatuan. Gainerako taldeek egindako zuzenketa onartu du, ordea, PPk.

Orain bi urte antzeko eskaria egin zion Senatuak Gobernuari, eta Palaciosek eskaera hura ez betetzea aurpegiratu dio Jose Luis Rodriguez Zapatero presidenteari. UPNko Mar Caballerok nabarmendu du Nafarroarentzako azpiegitura garrantzitsuena dela AHT. Ramon Corcuera EAJko senataria pozik agertu da, eta Nafarroako AHT Euskal Y-arekin nola lotuko den argitzeko eskatu du.