Berria.info

«Goizeroko irribarrea izan, eta herri honen parodiagile fina izateagatik», BERRIA egunkariko eta Nabarra, Aizu!, Karrika eta Xabiroi aldizkarietako marrazkilari Patxi Huarte Zaldieroa-k jaso du prentsa idatziko Argia saria. «Komiki zintak kazetaritza genero direla» erakutsi du Huartek, Argia-ko kideen ustez. Joseba Barandiaran ekonomialaria, Usurbilgo Udalaren Margotu Egunak publizitate kanpaina, Mikel Atxaga kazetaria eta Erlo telebistako Gure Saltsan saioa eta Librezale proiektua ere saritu dituzte aurten.

Atzo izan zen sari banaketa ekitaldia, Lasarte-Oriako (Gipuzkoa) Txitxardin Beltxa jatetxean. Nagore Irazustabarrena eta Lander Arbelaitz kazetariek Argia-ren -garai batean Zeruko Argia- sorreraren 90. urteurrenaren inguruan egindako dokumentalarekin ekin zioten sari banaketa ekitaldiari. Ondoren, sarituak Antton Mendizabalek egindako oroigarria jasotzen joan ziren. Aurten, gainera, berritua. Izan ere, Mendizabalek Argia-ren logo berrira egokitu du saria.

Ohikoa duen umorearekin, «oso urduri» zegoela aitortu zuen Uhartek. «Ez dut ezta janariaz ere disfrutatu; beraz, hurrengo urtean ere gonbida nazazue». Irakurleak izan zituen gogoan saria jasotzean. «Haiei esker jasotzen ditugu halako sariak».

Joseba Barandiaran ekonomialariarentzat izan da irratiko Argia saria, Euskadi Irratian egiten dituen analisi «argigarri, sakon eta dotoreengatik». BERRIAko kolaboratzailea ere bada Barandiaran. «Harrituta», baina «oso eskertuta» jaso zuen saria. Saria eskaini zien emazteari, Euskadi Irratiko Manu Etxezortu eta Oihane Yustos kazetariei eta «hedabideen ateak zabaldu zizkion» Jaime Otamendiri. Barandiaranek elkartasuna adierazi zien EITBko langileei, Egunkaria auziko auzipetuei eta Bilbo Hiria irratiko langileei. «Kafe Antzokia dela eta ez dela, gorriak ikusten ari dira».

Telebistako saria Erlo telebistako Gure Saltsan saioak jaso du, besteak beste, «etorkinen kulturak elkarrizketaren eremu intimoenetik, sukaldetik, erakustegatik». Iban Bengoetxeak jaso zuen saria, eta saria saioko gonbidatuena zela adierazi zuen. «Guretzat sari hau sekulakoa da, ilusio handia egiten digu. Lan talde txiki baten beharra saritu eta ezagutarazi dute. Ez dugu sekula ahaztuko».

Usurbilen (Gipuzkoa) hemendik aste batzuetara jarriko dute martxan atez ateko zaborren bilketa. Ekimen hori herritarren artean ezagutarazteko Usurbilgo Udalak abian jarritako Margotu egunak kanpainari eman diote publizitate ataleko saria. Kanpainak izandako «eraginkortasuna» eta «herritarren parte-hartzea bultzatzeko egindako ahalegina» saritu dituzte. «Proiektua abian jartzeko ezinbestekoa zen herritarren parte-hartzea, eta kanpainak asko lagundu digu horretan», adierazi zuen Usurbilgo alkate Xabier Mikel Errekondok.

«Softwareen bidez euskarari dimentsio globala emateagatik», Librezale proiektuak jaso du Interneteko Argia saria. Besteak beste, Firefox 3 Interneteko nabigatzailea euskaratu dute Librezale proiektuko kideek. Proiektuaren bultzatzaile Julen Ruiz Aizpuru eta Piarres Beobide eskertuta agertu ziren sariagatik. «Euskarak bizi behar badu, teknologiaren munduan ere bizi behar du. Alde horretatik, garrantzitsua da, edukiak ez ezik, tresnak ere itzultzea».

Merezimenduzko saria

Argia aldizkariak ez du urtero banatzen; aurten, ordea, Mikel Atxaga kazetariaren lana saritu nahi izan dute. Eta Merezimenduzko saria jaso du.

Elixabete Garmendia kazetariak irakurri zituen Atxagaren esker hitzak. «Nire poza bikoitza da, nirekin gogoratu zaretelako, eta Argia bilakatu zen Zeruko Argia bizirik eta sasoiko dirauelako».