Berria.info

Larunbatean AHTren aurka Urbinan (Araba) izaniko manifestazioaren osteko liskarrak direla eta, erantzun bila jarraitzen dute eragileek. Ertzaintzaren jarrera salatu dute Aralarrek, ezker abertzaleak eta ELAk, eta kontuak eskatu dizkiete erakunde publikoei. Arabako Batzar Nagusietako ezker abertzaleak iragarri duenez, AHTren aurkako manifestazioetan parte hartzeko arabarrek duten eskubideaz galdetuko diote Xabier Agirre ahaldun nagusiari.

Aralarrek ere ebazpen proposamen bat aurkeztu du Gipuzkoako Batzar Nagusietan, Ertzaintzaren jokabidea zein ETAk AHTren aurkako gatazkan esku hartu izana salatzeko. AHTren aurkako mugimendua «kriminalizatzea» onartezina dela gaineratu dute. Ildo beretik mintzatu da ELA sindikatua; egun hartan atxilotutakoen eginbideak Espainiako Auzitegi Nazionalaren esku utzi nahi izana salatu du, eta Ertzaintzaren jarduera ikertzeko eskatu dio Eusko Jaurlaritzari.