Berria.info

Larunbat honetan Urbinan (Araba) egingo den nazio manifestazioan parte hartzera deitu du AHT Gelditu! Elkarlanak. AHT Gelditu! Lurra berreskuratu! leloarekin, eguerdian abiatuko da protesta Urbinako plazatik, eta AHT abiadura handiko trenaren lan eremura joango da. «Inposizioari 'ez' indartsua eman eta Euskal Herrian AHT gelditzeko nahikoa indar badagoela erakusteko» antolatu dute manifestazioa, atzo Donostian agerraldia egin zuten AHT Gelditu! Elkarlaneko kideen esanetan.

«Urte hauetan guztietan ikasi dugu zerbait: borroka honen herri izaera izan da ikasi duguna; borroka bera zailago bihurtzeak ez du jarraitzearen beharra kentzen», ohartarazi du elkarlaneko kide Hilario Manzanedok. AHTren inguruko eztabaida eta aurkako jarrera zabaltzea «ezinbesteko» jo dute Manzanedok eta Mila Elortzak, eta AHTren aurkako mugimendua indartzeko eskatu dute: «Herritarrak izango gara AHT geratzea lortuko dugunak».

Elkarlaneko kideek adierazi dutenez, azken urteetan handitu egin da AHTren aurkako joera, eta horretarako «arrazoi guztiak» indarrean daudela adierazi dute: «Ingurumenean eragin larriak; errentagarritasun eza; funts publikoak xahutzea gastu sozialaren kalterako; gizartea desegituratzen duen garraio sistema elitista sustatzea; lurraldearen polarizazioa areagotzea, hiriburuen mesedetan; eta gizartearen parte-hartzea eta informazioa erabat baliogabetu izana. Gaur egun, inoiz baino arrazoi gehiago dago AHTri ezetz esateko».

Azpiegitura hori sustatzen ari diren EAJ, PSOE, UPN, PP eta EA alderdiak kritikatu dituzte, «hain xahutzaileak eta kaltegarriak diren azpiegiturak» sustatzeagatik. Alderdi horien egoitzen aurrean mobilizazioak egingo dituzte bihar. Eusko Jaurlaritzaren eta Nafarroako Gobernuaren jarrera ere salatu dute, informazioa eta prozesu parte-hartzaileak «ukatzeagatik».

Bestetik, Zornotzara joango dira, gaur goizean, Espainiako Sustapen Ministerioko ordezkariak lurrak desjabetzeko aktak sinatzera. AHT Gelditu! Elkarlanak gaurko deitu du protesta, 08:30ean, udaletxe aurrean.