Berria.info

Operazio «prebentiboekin» lotutako bigarren epaiketak aurrera jarraitzen du Madrilen. Atzo egin zuten bigarren saioa, eta Eneko Perez akusatuari deklarazioa hartu zioten. ETAri ez diola inoiz lagundu deklaratu zuen Perezek, eta atxilotu eta inkomunikatuta eduki zuten garaian hori esan bazuen torturatu egin zutelako izan zela azaldu zuen Espainiako Auzitegi Nazionalean.

Perez hamabi auzipetuetako azkena izan zen deklaratzen. Besteek herenegun egin zituzten deklarazioak, eta haietako gehienek ere inkomunikazio aldian torturatu egin zituztela salatu zuten. Atzo, Perezen deklarazioaren ostean lekukoen txanda izan zen. Poliziak dira lekuko guztiak.

Ibon Fernandez Iradi ustezko etakideari atzeman omen zieten dokumentazioekin lotutako polizia operazioen ondorioz egiten den bigarren epaiketa da hori. ETAren erakartze taldearekin lotzen ditu fiskalak auzitara eraman dituen hamabi lagunak, eta ETAko kide edo laguntzaile izatea leporatzen die. Sei eta bederatzi urteko espetxe zigorrak eskatzen ditu fiskaltzak akusatuen aulkian eserarazi dituen hamabi lagunentzat.