Berria.info

Joan den asteartean J.B.C. 31 urteko Gasteizko bizilaguna hil zen Langraizko kartzelan (Araba). Oraindik ez dute argitu zergatik hil zen, Salhaketak ohar baten bidez adierazi duenez. Dena den, elkartearen hitzetan, heriotza ez zen «naturala» izan.

Presoen aldeko elkarteak jakinarazi duenez, hilik agertu den presoa abenduaren 19an atxilotu zuten, eta bi egun geroago espetxeratu zuten, abenduaren 21ean. Hurrengo egunean, epailearen aurretik pasa ondoren, berriro ere kartzelara eraman zuten. Horrez gain, hil baino egun bat lehenago bakartze gunera bidali zuten presoa. Auzitegiko medikuek eman zioten zendutako presoaren bikotekideari heriotzaren berri.

Salhaketaren arabera, Espetxe Zuzendaritzaren politika salatzekoa da, espetxeetan izaten diren heriotzen inguruko informazioa ezkutatu eta atzeratu egiten baitu haren irudiko. Gainera, legea «zorrotz» betez gero espetxeetako heriotza gehienak eragozteko modua badagoela uste du elkarteak. Hartara, arazo horri aurre egiteko zer egin asmo duten galdetu die Sahlaketak Espainiako Gobernuari, Barne Ministerioari eta Espetxe Erakundeen Zuzendaritzari. Kartzeletako bizi-baldintzak zergatik egin duten okerrera eta gaixotasun larriak dituzten presoak zergatik ez dituzten aske uzten ere galdetu die presoen eskubideen aldeko taldeak agintariei.

Bide horretan, preso gasteiztarraren heriotza azkena izateko neurriak hartzeko eskatu du; espetxeetako osasun zerbitzua kalean jaso daitekeenaren parekoa izateko, besteak beste.

Espetxeetan gertatzen diren heriotzak saihesteko, presoen bakartze eta inkomunikazio egoerak amaitzea ere beharrezkotzat dauka elkarteak; izan ere, heriotzak areagotzeko arrisku guneak dira horiek, Salhaketaren arabera. Ildo horretatik, asteartean gertatutako heriotza sakon aztertzeko eskatu dio Fiskaltzari.