Berria.info

Cegasari pila ahitu zaio. Aurten pilak ekoizten 22,5 milioi galtzea nahikoa dela erabaki du. Iaz pilekin lotura duten negozioetan zazpi milioi euro inguru galdu zituen. Cegasak aitortu du «egoera larrian» dagoela. Pilen salmenten «bat-bateko jaitsierak» eta pilen salneurria merkatzeak eragin dute egoera hori. Baita lehengaiak garestitzeak ere. Ondorioz, Cegasak atzo aurkeztu zien krisi ekonomikoari aurre egiteko bere plana langileei: kontsumo pilak ekoizten dituen Gasteizko lantegia ixtea eta 240 langile inguru kaleratzea.

Cegasaren asmoa kaleratze horiek negoziatzea da. Erretiro aurreratuak eta ordaindutako kaleratzeak proposatu nahi dizkiete 240 langile ingururi. Planean sartzen diren langileei beste lan bat aurkitzen lagunduko die.

Pilen sektoreak gainbehera egin du azken urteetan: hogei urtean desagertu egin dira Europako pila ekoizleen %70 baino gehiago, Cegasak emandako datuen arabera.

Kontsumo pilak -etxetresnetan erabili ohi diren pilak- ekoizteari utziko dio, baina ez dio pilak saltzeari utziko. Cegasak pilak ontziratzen eta paketatzen jarraituko du Gasteizko lantegian. Arlo horretako I+G+(b) ere mantenduko du.

Kontsumo pilak ez, baina pila industrialak egiten segituko du Oñatiko lantegian (Gipuzkoa). Pila industrialez gain, eskuargiak eta manganesoa egiten dituzte bertan. Cegasak mila langile baino gehiago ditu Euskal Herrian.

Enpresak lau lantegi eta hamabost adar ditu, eta bere produktuak munduko hirurogei herrialdetan baino gehiagotan saltzen dira.

Historia luzeko enpresa

Cegasak pilen ekoizpena bertan behera utzi ostean, Europan lau pila ekoizle nagusi daude: hiru Ameriketako Estatu Batuetakoak (Energizer, Duracell eta Rayovac) eta bat Japoniakoa (Panasonic).

Cegasak historia luzea du. 1920ko hamarkadan aterki fabrika batekin abiatu zen proiektua 1934an pila fabrika bihurtu zen, Oñatin: Tximist. Pilez gain, eskuargiak eta bonbillak ere egin zituzten.

1983an enpresari izena aldatu zioten: Tximist izatetik Cegasa izatera pasatu zen. Juan Zelaia enpresako akziodun nagusiak kontatzen duenez, izena aldatu zioten Espainian zailtasunak zituztelako produktuak saltzeko Tximist izen komertzialarekin. Orduan enpresaren jabe ziren hiru familien abizenen -Celaya, Emparanza eta Galdos- akronimoa aukeratu zuten marka berria sortzeko: Cegasa.

Taldea etengabe handitu da: 2000. urtean, esaterako, Solac etxetresna elektrikoen ekoizlea bereganatu zuen. Iaz Solacek 3,3 milioi euro irabazi zituen.

Gaur egun, Juan Zelaia Cegasa, Tuboplast eta Hidronor enpresen arduraduna da. Tuboplastek plastikozko ontzi malguak eta tapoiak egiten ditu, kremak eta hortzetako pasta sartzeko, esaterako. Europako ekoizle nagusietako bat da, eta bezeroen artean Nestle, Lacer, Krafft eta L'Oreal ditu, besteak beste.

Tuboplastek 2,3 milioi euroren irabaziak izan zituen iaz. 68 milioiko negozio bolumena izan zuen, eta aurten 85 milioi eurora iritsi nahi du. Bi lantegi ditu, bata Miñaon (Araba) eta bestea Charmeilen (Frantzia), eta 700 langile inguru guztira.

Hidronor hiri hondakinen eta hondakin industrialen tratamenduaz arduratzen da.