Atentatuaren kontra agertu dira AHTren aurkako zenbait eragile
ETAren «metodoekin» ez dutela bat egiten eta azpiegitura geldiaraztea herri mugimenduari dagokiola esan dute
Erredakzioa
ETAk herenegun egindako hilketa gaitzetsi dute AHT Gelditu! Elkarlaneko kide diren ESK sindikatuak, Ekologistak Martxan-ek eta Mikel Alvarez AHT Gelditu! Elkarlaneko eledunetako batek.
Inazio Uria enpresaburu azpeitiarraren hilketak «amorrua» eragin diola eta ETAk auzi horretan esku hartzea gaitzesten duela esan du Alvarezek, Efe berri agentziari eginiko adierazpenetan. Bere izenean soilik ari zela zehaztu du.
AHTren aurkako mugimenduaren oinarriak «mobilizazioa, erresistentzia eta desobedientzia zibila» direla nabarmendu du AHT Gelditu! Elkarlaneko kideak. «AHT geraraztea eta eztabaida sustatzea gizarte mugimendutik sortzeko gai izango garen dinamikak eragingo du, eta ez erakunde armatu batek hartu duen ustezko berme rolak».
Atzoko atentatuaren ondorioz AHTren kontrako mugimenduan borroka moldeei buruzko «gogoeta sakona» abiatu behar dela esan du Alvarezek. Gogoeta ere eskatu die alderdi politikoei; alde horretatik, «egungo egoerara nola iritsi garen hausnartzeko» galdegin die.
«Inolako justifikaziorik ez duen krimena» gaitzetsi du, halaber, ESK sindikatuak. Komunikabideei igorritako agiri batean dio ez duela bat egiten «ETAren metodoekin», eta gaineratu du erakunde armatua «oztopo» baino ez dela «azpiegitura zentzugabeen kontra dagoen herri mugimenduarentzat». Halaber, «oinarrizko giza eskubideen kontrako jarduna» bertan behera uzteko eskatu dio ETAri.
Ekologistak Martxan-ek antzeko hitzak erabili ditu atentatua gaitzesteko. Halako ekintzekin «benetako gizarte eztabaida» kaltetzea egotzi dio ETAri .
Erreakzioak
Elkargi
Hego Euskal Herriko hainbat enpresa biltzen dituen Elkarrekiko Garantia Elkarteak (Elkargi) gogor gaitzetsi du ETAren azken atentatua. Inazio Uria zenaren familiari eta enpresako langileei elkartasuna adierazi die elkarteak, eta gogorarazi du Elkargiko sortzaile «historikoetako» bat izan zela Uria. «Modernitatearen eta aurrerabidearen aurkako» erasotzat jo du hilketa Elkargik .
Innobasque
Berrikuntzaren Euskal Agentziak (Innobasque) hilketa gaitzetsi eta ekintza horrekin erakunde armatuak ezarri nahi duen «izu-ikara» salatu du. Innobasqueren aburuz, «ezin zurituzkoa, jasanezina eta guztiz baztergarria» da atentatua. «Gizarte osoaren ongizatearen aukako ekintza bortitza izan da».
Ajebask
ETAren atentatu «koldarra» gaitzetsi du Euskadiko Enpresaburu Gazteen Elkarteak (Ajebask). Erakunde armatuari exijitu dio bortizkeria amaitzeko eta euskal gizarteari «bakean eta demokratikoki» bere etorkizuna erabakitzen uzteko. Ajebasken aburuz, Inazio Mujikaren hilketa «euskal herritarrek demokratikoki erabaki duten elkarbizitzaren zutabeen aurkako atentatua» izan da.
Udalbilde
ETAri armak eta bortizkeria «behin betiko» uzteko eskatu diote EAJ eta EAko hautetsiek osatzen duten Udalbiltza-Udalbide elkarteko kideek. ETAren azken atentatua gaitzetsi dute. Inazio Uriaren senide eta lagunei elkartasuna adierazi eta hilketa gaitzesteko egingo diren ekimenetan parte hartzeko deia egin dio euskal gizarteari.
Albisterik...
Irakurrienak
-
1
-
2
-
3
-
4
-
5
Bozkatuenak
-
1
-
2
-
3
-
4
-
5
Irakurrienak
© Berria.info - Euskal Editorea S.L.
Martin Ugalde Kultur Parkea, Andoain 20140 43.223785 -2.014929
Telefonoa: 943 304 030 / Faxa: 943 590 172
Laguntzaileak:
