Berria.info

Genero indarkeria desagerrarazteko gizonek duten erantzukizun berezia gogorarazi dute instituzioek, bereziki Emakundek antolatutako Gizonduz ekimenaren ekitaldian. «XXI. mendeko lotsarik handienetakoa, baita euskal herritarrontzat ere». Hitz horiekin definitu du Juan Jose Ibarretxe Eusko Jaurlaritzako lehendakariak emakumeen aurkako indarkeria. Mundu osoan indarkeria mota hori «globalizatuta» dagoela salatu du, eta herritarrak, gizonezkoak bereziki, horren aurka lan egitera deitu ditu. Erakundeek ere horretan lan egin behar dutela azpimarratu du, uste baitu gizonen eta emakumeen arteko berdintasuna dela «XXI. mendeko proiektu politiko garrantzitsuena euskal gizartearentzat». Emakumeei ere dei egin die, «bizitzaren liburua gizonekin batera idazteko, orain arte gizonek bakarrik idatzi dituztenak baino sakonagoak eta askeagoak izango direlako».

Gizonduz ekimenaren ekitaldian egin zituen atzo adierazpen horiek Ibarretxek, Bilbon. Ekitaldian izan ziren, besteak beste, Eusko Legebiltzarreko presidente Izaskun Bilbao; Arabako, Bizkaiko eta Gipuzkoako ahaldun nagusiak; Jaurlaritzako hainbat sailburu; Jokin Bildarratz Eudeleko presidentea; eta hainbat alderdi politikotako ordezkariak. Dantza, musika eta kantua uztartu zituzten, guztiekin emakumeen aurkako indarkeria gaitzesteko.

Izaskun Moiuak ere, Emakundeko presidenteak, gizonek duten egitekoa azpimarratu du. «Aurpegi asko dituzte erasoek, baina leku bakarretik jaiotzen dira: gizonak emakumeen jabe izan daitezkeela uste izatetik». Hartatik, indarkeria desagertzeko, lehenbizi desberdintasuna desagerrarazi behar dela adierazi du. Eskerrak eman dizkie orain arte emakumeen eskubideen alde lanean aritu diren elkarteei, baina oraindik ere «biktima» asko dagoela gogorarazi du, «batez ere ahanzturaren biktimak».

Gaitzespena, aho batez

Nafarroako Parlamentuko Bozeramaileen Batzordeak aho batez onartu zuen, atzo, genero indarkeriaren kontrako adierazpena. PSNk aurkeztu eta bozeramaileek onartutako testuak jasotzen duenez, genero indarkeria ezabatzea guztien betebeharra da, instituzioena eta herritarrena: «Kontzientzia hartuz eta denon konpromisoarekin baino ezingo dugu amaitu giza eskubideen urratze zaurgarri hori».

Gipuzkoako Foru Aldundian, berriz, genero indarkeria sufritu duten zazpi emakumeren testigantzak irakurri zituzten atzo eguerdian. Esmeralda Berbel idazle katalanaren Ongi trata nazazu liburuan jasotako testigantzak irakurtzen esku hartu zuten Parlamentuko presidente Rafaela Romerok, Berdintasunerako Batzordearen presidente Rebeka Uberak eta Acovidem Etxeko Indarkeriaren Aurkako eta Haurren Defentsarako Elkarteak. Politikari eta kulturgile ezagunak ere izan ziren tartean, Iñaki Galdos, Ainhoa Arteta, Begoña Ameztoi edo Arantxa Urretabizkaia, besteak beste.

5.000 telefono dei

Genero indarkeria nozitzen duten emakumeen inguruko pertsonei «konplize» ez izateko eskatu die Eusko Jaurlaritzako Gai Sozialetako sailburu Javier Madrazok: «Beste aldera begiratzen badute, konplize bihurtzen dira». Tratu txarrak edo sexu erasoak jaso dituzten emakumeentzako Eusko Jaurlaritzaren Telefono Zerbitzuari (900-84 01 11) buruzko balantzea aurkeztu zuen, atzo, Madrazok. Telefono zerbitzua erasoak jasotzen dituzten emakumeek erabil dezakete, baina haien senideek, lagunek, bizilagunek eta lankideek ere erabili behar dute, sailburuaren ustez. Telefono zerbitzuak 5.000 dei jaso ditu hiru urtean, eta 2.500 emakume «babestu, aholkatu eta artatu» ditu, Madrazoren arabera.

Bestetik, PSE-EEko presidente Patxi Lopezek ere salatu du genero indarkeria: «Guztioi dagokigu mezu argi eta sendoa ematea tratu txarrak eragiten dituztenei: honaino heldu gara, ez dugu gehiago onartuko».