Berria.info

Gabon zahar egunean Txileko Padre de las Casas herrian atxilo harturiko Asel Luzarraga Zarrabeitia euskal idazle eta musikaria (Bilbo, 1971) aske uzteko eskatu zuten atzo kulturaren esparruko hainbat ordezkarik, Leioan, Txilek Bizkaian daukan kontsulatuaren aurrean eginiko elkarretaratzean. Euskal PEN Klubaren ekimenez egin zuten bilkura. Izan ere, erakunde horretako lehendakariak, Laura Mintegik, Asel Luzarraga «egiaz nor den» azaltzen duen gutuna eman zion kontsulari, euskal idazlea «kargurik gabe» «berehala libre uzteko» eskatzearekin bat.

Bizkaiko ordezkaritza horretako kontsulak ez zuen hedabideen aurrean azaldu nahi izan, baina Mintegik adierazi zuenez, «jarrera ona» agertu zuen Euskal PEN Klubeko ordezkariekin. «Gutuna Bartzelonako eta Madrilgo kontsulatu nagusietara bidaliko duela agindu digu, eta prest azaldu da bere bitartez beharrezko ditugun harreman diplomatiko guztiak egiteko», azaldu zuen Mintegik, bileratik irtetean.

Asel Luzarraga Urtezahar egunean atxilotu eta espetxeratu zuten, Txileko La Araucania eskualdeko Justizia idazkaritzan izandako atentatu saio batekin lotura izatea egotzita. Etxean zela hartu zuten atxilo. Izan ere, iragan martxoaz geroztik Txilen bizi da idazlea, Padre de las Casas herrian. Haren etxebizitzan eginiko miaketan, lehergailuak egiteko materiala aurkitu zutela zabaldu zuten polizia iturriek hasiera batean. Egunak igaro ahala, alabaina, akusazioak indarra galdu du. Eta Luzarragak berak senide zein hurkoekin egunotan izan dituen telefono elkarrizketetan behin eta berriro ukatu du etxean halakorik zeukanik.

Nolanahi ere, epaileak bihar hartuko dio deklarazioa, eta orduantxe erabakiko du idazlearen aurkako prozedurarekin aurrera jarraituko duen edo bertan behera laga eta kargurik gabe libre utziko duen. Itxaropentsu egoteko arrazoiak badituztela uste arren, Luzarraga Txiletik kanporatuko ote duten beldur dira senideak.

Maputxeen defendatzaile

Hamaika ispilu ganbil (2003), Karonte (2005), Mozorroaren xarma (2007) eta Abaraska (2008) liburuen egilea izateaz gain, Euskal PEN Klubeko zuzendaritzako kidea ere bada Luzarraga, eta nazioarteko PEN Clubeko Writers for Peace (Bakearen aldeko idazleak) batzordean lan eginikoa.

Anarkista pentsabidez, maputxeen lurraldetasun eskubideen alde aritu izan da Txilen. Haatik, Mintegik argi dauka: «Ezagutzen dugunok badakigu soilik hitzaren bidez borrokatzearen aldekoa dela». Hortaz, «gainerako guztia gezurra baizik ez» dela salatu du Euskal PEN Klubeko lehendakariak. «Giza eskubideen defendatzaile sutsua da; horregatik, pentsaezina da Aselek [Luzarraga] bortizkeria erabili izana».

Luzarraga PEN Clubak aurten Tokion egingo duen biltzarra prestatzeko lanetan murgildurik dabilela azaldu du Mintegik.

 

Sinadurak

Sinadurak biltzeko kanpaina martxan da Asel Luzarragaren alde. Hona zenbait sinatzaile:

Beñat Sarasola

Aritz Gorrotxategi

Edorta Jimenez

Eider Rodriguez

Eneko Olasagasti

Fermin Muguruza

Garbiñe Ubeda

Gorka Arrese

Harkaitz Cano

Hasier Etxeberria

Iban Zaldua

Imanol Ubeda

Iñigo Aranbarri

Jose Luis Otamendi

Joseba Tapia

Josu Landa

Juan Ramon Makuso

Kirmen Uribe

Koldo Izagirre

Lander Garro

Leire Bilbao

Lutxo Egia

Oier Guillan

Rafa Rueda

Uxue Alberdi

Xabier Mendiguren Elizegi

Xabier Gantzarain

Txuma Murugarren

Patxi Salaberri

Urtzi Urrutikoetxea

Patxi Larrion

Gotzon Barandiaran

Markos Zapiain

Juan Luis Zabala

Gari Berasaluze

Hedoi Etxarte

Xabi Borda

Gorka Bereziartua

Hasier Rekondo

Laura Mintegi

Mikel Soto

Elkartasuna agertzeko sinadura eman nahi izanez gero, bisitatu webgune hau: www.aselaskatu.org