Berria.info

Euskararen Erakunde Publikoak 2010-2016rako jokabide esparruen proiekturako akordioa deritzona onartu du eta bertan euskararen erabilpena indartu nahi du. Hiztun osoak sortzea ukanen du helburu, eta gazteengan eragitea izanen da lehentasuna. Orain arteko lehentasuna transmisioan eragitea izan bada ere, euskararen erabilpena sustatzea funtsezkoa dela nabarmendu zuen Max Brisson EEPko presidenteak. «Erabilpenari ez diogu eman behar duen garrantzia, eta, horregatik, orain arteko hizkuntza politika maingu egon da».

Onartu duten txostena behin-behinekoa izanen da. Izan ere, 2010eko ekainean ebatziko da behin betiko xedea. 2010eko abuztuan EEPren oinarrian dagoen egitura, interes publikoa duen elkargoa luzatzea onartuko da eta indarrean egonen da 2016ko abuztura arte.

2010eko aurrekontua 3.056.000 eurokoa izanen da, eta aurtengoarekiko 420.000 euro emendatuko da. Aurrekontuaren osaketari dagokionez, EEPko partaide nagusietako bakoitzak (Estatua, Akitania eta Departamendua) 740.000 euro ezarriko ditu, orain baino 120.000 euro gehiago bakoitzak. Horrez gain, Akitaniak 60.000 euroko gehigarria eskainiko du, Departamenduak bezala. Egitura bakoitzak aurten baino 10.000 euro gehiago onartu ditu. Herri arteko sindikatuak 40.000 euroko gehigarria onartu du. Eusko Jaurlaritzak orain arteko ekarpena berretsiko duela jakinarazi zuen Brissonek.

Euskararen alde baliatuko diren funtsak handiagoak izanen direla azpimarratu zuen Brissonek. Xede berriak EEPren esku ez dauden hainbat eremutan ukanen du eragina. Adibidez, haurtzaindegietako langileen prestakuntza bere gain har dezala eskatuko dio Frantziako Hezkuntzari. Gisa berean, tokiko erakundeen langileen prestakuntza bere gain har dezala eskatuko diote prestakuntza egiturei. «Herriek eta erakundeek langileen prestakuntzari dagozkion zergak ordaintzen dituzte. Bidezkoa da egitura horiek politika publikoak finkatu dituzten lehentasunak onartzea eta diruztatzea». prestakuntza egiturek ez dute egundaino onartu hizkuntza ikastaroak ordaintzea.

Bizi publikoan eragitea nahi bada, tokiko erakundeek eta Herriko Etxeek langile euskaldunak beharko dituzte. Horretarako baliatuko diren diru partidak prestakuntza erakundeek ordainduko dituzte eta ez da hizkuntza politikaren aurrekontuan agertuko.

Erronkak hiru sailetan

Hizkuntza politikaren xedean hiru atal nagusi finkatu dituzte, transmisioa, erabilera eta zeharkako eremuak. Horien baitan hamabi erronka finkatu dituzte, hala nola familia transmisioa, lehen haurtzaroa, irakaskuntza, helduen euskalduntzea, hedabideak, aisialdiak, argitalpena eta bizitza soziala.

Sail zabal horiek azpi-eremuetan garatuko ditu EEPk, bereziz berezko logika eta antolaketa dituztenak, molde independentean jorratzen ahal direnak eta esku-hartze estrategia berezitua dutenak. Gidaritza eskema bat osatuko du eremu bakoitzarentzako.

Aholku Batzordeak abenduan burutu dituen bi bilkuretan ekarpenak egin zituzten euskalgintzako gizarte eragileek. Bertzeak bertze helburuak zehazteko, epeak finkatzeko eta neurgailuak ezartzeko eskatu zioten EEPri. «Orain artean horren kontrakoa nintzen baina iritziz aldatu dut eta xedean onartu ditugu». Azpi-eremuak garatu ahala garatuko dituztela jakinarazi du.