Berria.info

Esne ekoizleak hondoa jota daude. Esne litroa ekoiztea 0,36 euro inguru kostatzen zaien arren, ez diete 0,30 euro baino gehiago pagatzen. Nazkatuta daude sektoreko enpresa handien eta banatzaileen «gehiegikeriez». Eta hori salatzera irten dira kalera. Espainiako hainbat hiri izan dira abeltzainen protesten lekuko. Madrilen, esaterako, 500 bat nekazari bildu dira; tartean, baita Nafarroatik joandako EHNEko kideak ere. Esnez beteriko kamioi bat hustu dute Carrefourren saltoki handi baten parean. Avilan ere (irudian) dozenaka abeltzain elkartu dira, beste horrenbeste egiteko. Kontrola handitzeko eskatu diete administrazioei, eta Frantziara so egitea galdegin du Nafarroako EHNEk, han mahai bat osatu dutelako denen artean hitzartzeko prezioak eta marjinak.