2012-06-02
Hizpideak
Hauteskunde giroan
Mikel Lizarralde
mlizarralde@berria.info
Ipar Euskal Herrian bozen bezperan eta Euskal Autonomia Erkidegoan kanpaina luze baten atarian egonik, atzodanik Euskal Herri osoa dago hauteskundeei begira. EAEn eskuinak kendu die babesa sozialistei, eta Nafarroan, aldiz, PSNk iradoki egin du foru gobernua utziko duela.
Babesa kentzeko arrazoiak, nolanahi ere, aski ezberdinak izan dira batean eta bestean. Patxi Lopezen gobernua legegintzaldiaren azken txanpan sartuta ikusi duenean eman dio bizkarra PPk. Eskuinak Madrilgo gobernua eskuratuta, ondoriozta zitekeen Basagoitiri ez zaiola interesatzen sozialisten eskutik agertzea, are gutxiago bozak miran izanda. Gero bestelako aitzakiak eman dituen arren.
Nafarroako kasua ezberdina da. Sozialistek UPNrekin gobernu akordioa egiteko erabakia hartu zuten, aukera progresista bati uko eginez. Orain, Barcinaren gobernuak 132 milioi euroko gastua ez egitea bere kasa erabaki duenean, sozialistek argi erakutsi dute neurriarekin ez daudela ados. Eta agerian utzi dute gobernu krisia.
