2011-04-12
Komunikazioa
EITBk ezker abertzaleari jarritako betoa salatu dute kazetariek
Espainiako kazetarien elkartearen ustez, hartutako neurria «hedabideen funtzioen eta langileen aurka doa»
M.A.
Otsailaren 28an Eusko Legebiltzarrak EITBren inguruan onartu zuen ebazpena salatu du FAPE Espainiako kazetarien elkarteak. «Legez kanpoko Batasunaren ordezkariak» EITBko saioetara ez gonbidatzeko eskatu zion legebiltzarrak zuzendaritzari, baita «terroristei, legez kanpoko erakundeei edo erakundeak ordezkatzen, justifikatzen eta haien ekintzak babesten dituztenei» lekurik ez emateko ere.
Euskal Kazetarien Elkarteak erabaki horren aurkako eskari orria aurkeztu zuen Espainiako kazetarien elkartean, «administrazio publikoa kazetaritza lanean sartzearen» aurka. Aurkeztutako eskari orria aho batez onartu du Espainiako kazetarien elkarteak. «Erakunde politiko baten proiektuaren inguruko berririk ez ematea hedabideen funtzioen eta profesionalen aurka doa». Horrekin batera, kazetariak «gertatzen dena jasotzeko betebeharra» duela adierazi dute, baina horrek ez duela «berez kazetaria gertakizunaren alde edo kontra jarri behar». Gainera, ahotsa batzuei bakarrik emateak «beste errealitate batzuen existentzia ukatzea» dakarrela adierazi du Espainiako kazetarien elkarteak.
