Berria.info

Interneteko gunean izango du Arrosa sareak 2009-2010eko denboraldiko berrikuntza nabarmenena: irratiek trukerako jarriko dituzten 30 irratsaioak entzuleek entzun, ordenagailura ekarri eta sindikatzeko aukera izango dute. Hartara, euskaraz irratsaio gehien eskaintzen duen webgunea bilakatuko da www.arrosasarea.org. Berrikuntza horrekin, Euskal Herriko herri edo eskualdeetan sortzen dituzten saioak nork bere etxean Internet bidez entzuteko aukera izango da. Irratien webguneetako euskarazko albisteak eta irrati batzuen zuzeneko emanaldiak ere eskura izango ditu erabiltzaileak.

Audioen truke kopurua handitu egin du denboraldi honetan Arrosak. Hogeita hamar irratsaio trukatuko dituzte irratien artean denboraldiaren hasiera honetan. Aurreneko aldiz, Antxeta irratiak eta Koskak euren irratsaioak eskainiko dituzte beste irratientzat.