Berria.info

«Zu zeu gabe jai daukagu», horixe da albistari digital berri honen printzipio nagusia. ZuZeu.com gunearen helburua, erabiltzaileek eurek albistari digital bat egitea da. Horizontalki. Herenegun martxan jarri zuten arte, webgunea bultzatu duen GuGeu enpresa itxian aritu da guztia prestatzen. Baina iritsi da dena probatzeko momentua, eta horretarako sarean lan egitea beharrezkoa da. Eta, bide batez, jendearen iritzia eta proposamenak jasotzeko aukera ere ematen du. «Poliki-poliki aztertuko ditugu horiek guztiak. Eta hobetzeko badira, hobetuko dugu, horretarako gaude», azaldu du Hasier Etxeberria kazetariak. GuGeu irabazi asmorik gabeko ekimeneko partaidea da bera.

Leiho berri bat

Baina zer da ZuZeu? Azken batean, eta bere sortzaileek diotenaren arabera, Internetzale euskaldunok munduari begiratzeko leiho moduko bat. Bide batez, blogen blog moduko bat izateko helburua duena, «nor bere aldetik ibili beharrean, elkarren ondoan hobeto gaudelakoan». Horretarako, baina, erabiltzaileen ezinbesteko parte hartzea beharko du webguneak. Eta dagoeneko hasi dira mezuak, iruzkinak, irudiak, bideoak...jasotzen.

Printzipioz bi erabiltzaile mota izango ditu albistari digital honek. 'Begiraleak' batetik, eta 'Zuzeulariak' bestetik. «Begiraleak dira, nolabait izena dutenak eta norbait direnak gure kazetaritzan, letretan edo gure mundutxoan. Eurak izango dira argitaratuko dituzten lanen erantzule», azaldu du Etxeberriak. «Zuzeulariak, printzipioz, erabiltzaile anonimoak dira. Hasieran zuzendu egin beharko dira beraien testuak, hornitu, ilustratu...eta zergatik ez esan: zaborra badator filtratu», gaineratu du. Hala ere, kudeatzaileen asmoa da, egunen batean Zuzeulari horiek ere Begirale izatea. «Bi edo hiru sarrera txukun egiten dituenean, nolabait bera ere izan dadila autonomo». Hau da, Etxeberriaren hitzetan, GuGeuk tresna bat eskaini eta horren kudeaketa egiten du: «Ez gara hainbeste informazio sortzaileak. Horretarako indar ekonomikorik ez dugulako».

Gauzak mugitzen ari dira

Azken batean, proiektu horizontala da ZuZeu. «Erabiltzaileek egiten dutena izango da. Egiten badute, noski», azaldu du Etxeberriak. Gertatzen dena gertatzen dela ere, ez du uste porroterako tartea dagoenik. «Porrotik ez dago. Gauzak mugitzen ari dira Interneten, baita euskarari dagozkion gauzak ere, eta gu zoriontsu gaude. Orain badago gauza bat lehen ez zegoena, eta eragiten ari da». Mugitzea zen GuGeuren xedea, eta Etxeberriaren ustez helburuak beteta daude.

Internet zale euskaldunen talde baten asmoetatik abiatu zen ZuZeu proiektua. «Konturatu ginen euskaldunek ere beste hizkuntza batzuk ezagutzen dituztela eta ibiltzen garela ingelesez, frantsezez, katalanez... Eta gauza arras interesgarriak ikusten ditugula», azaldu du Etxeberriak. «Hori guztia nolabait gure munduan ez islatzeak pena ematen zigun». Hainbat bide jorratu ostean -Sustaturekin harremanetan jarrita, besteak beste- proiektua abian jartzeko irabazi asmorik gabeko talde bat sortu zuten. «Horixe da GuGeu», azaldu du Etxeberriak. Taldeko partaide indartsuena Digitalak ekoiztetxea da. «Euskalgintzan ibiliak dira, eta beraiekin egin dugu aurrera, proiektu honek enpresa ahalegin bat behar duelako».